ලොව පළමු පියාසර මෝටර් රථයට එක්සත් ජනපදයේ අනුමැතිය

පියාඹන කාර් කියන්නේ පොඩි කාලේ අපි දැකපු film, cartoon වල තිබ්බ දෙයක්. හැබැයි ඉගිලෙන්න පුළුවන් විදිහට මෝටර් රථ නිෂ්පාදනය කරන ඉතිහාසය, චිත්‍රපට සහ cartoon නිර්මාණයට එහා ගිය එකක්. මොකද මුලින්ම සැහැල්ලු ගුවන් යානයක් නිර්මාණය කරන්නේ 1909 දී. ඒ අමෙරිකානු ජාතික Waldo Waterman නම් අයෙක්. හැබැයි සැහැල්ලු ගුවන් යානයක් කිව්වට මේක ග්ලයිඩරයක්.

කෙසේ හෝ 1929 දී පෙරට වඩා තාක්ෂණයෙන් ඉහළ “Whatsit” කියන ගුවන් යානය නිර්මාණය කරනවා. නමුත් මෙය නිර්මාණය වුණේ සාමාන්‍ය ගුවන් යානාවල වගේ දිගු වලිග කොටසක් නොමැතිව. ඉතින් මේ සංකල්පය තමයි පියාඹන මෝටර් රථ නිර්මාණය කරන්න පොලඹවලා තියෙන්නේ. ඉතින් අද MotorGuide අපි ඔබට අරගෙන ආවේ සිහිනයක් යථාර්තයක් බවට පත් කළ එක්සත් ජනපදයේ අනුමැතිය ලැබූ ලොව පළමු පියාසර මෝටර් රථය ගැනයි.

Alef Aeronautics ගේ පියාසර කරන මෝටර් රථය, ඇමරිකානු රජයෙන් නීතිමය අනුමැතිය ලබා ගැනීමට සමත් වෙලා තියෙනවා. ඒ එක්සත් ජනපදයේ අනුමැතිය ලැබූ ලොව පළමු පියාසර මෝටර් රථය ලෙසයි.

ගුවන් සේවා නීති සමාගමක් වන Aero Law Center ආයතනයට අනුව, එක්සත් ජනපද Federal Aviation Administration (FAA) වෙතින් විශේෂ ගුවන් යෝග්‍යතා සහතිකයක් ලැබී ඇති බවයි මෝටර් රථ සමාගම නිවේදනය කරලා තියෙන්නේ.

මෙවැනි වාහනයක් එක්සත් ජනපදයේ සහතික කළ පළමු අවස්ථාව මෙය බවද විදෙස් මාධ්‍ය වැඩිදුරටත් වාර්තා කරනවා.

Alef Aeronautics ගේ පියාසර කරන මෝටර් රථය සියයට 100ක් විදුලි බලයෙන් තමයි ක්‍රියා කරන්නේ. ඒ වගේම මේ රථයට, එක් අයෙකු හෝ දෙදෙනෙකු රැගෙන යෑමටත් හැකියාව තියෙනවා.

Alef Aeronautics සමාගම පවසන්නේ මේ මෝටර් රථය ගුවන්ගත කිරීම සහ ගොඩබෑම සහ භූගත යටිතල පහසුකම් අතර අන්තර්ක්‍රියා පාලනය කිරීම සඳහා එහි ප්‍රතිපත්ති පිළිබඳව මේ දිනවල ක්‍රියාකාරීව කටයුතු කරන බවයි.

මේ රථයට නවතා ඇති රථවාහන හා අනතුරුවලට ඉහළින් පියාසර කරන්න හැකියාව තියෙන නිසා මෝටර් රථය දළ වශයෙන් ඩොලර් 300, 000ක පමණ මුදලක් වන බවයි වාර්තා වෙන්නේ.

2025 වසරේ අවසානය වන විට Alef Aeronautics සමාගම පාරිභෝගිකයින්ට පියාසර මෝටර් රථ ලබා දීම ආරම්භ කිරීමට බලාපොරොත්තු වන බව නිවේදනය කරලා තියෙනවා. එහෙනම් තව අවුරුදු දෙකකින් අපි බලමු නේද Car එකකින් අහසේ යනකොට මොන වගේ හැඟීමක් දැනෙයිද කියලා