අයහපත් කාලගුණයෙන් මෝටර් රථ ප්‍රවාහන දෙපාර්තමේන්තුවේ පරිගණක පද්ධතිය බිඳ වැටේ - මගහැරුණු විභාග සඳහා නව දින සහ විශේෂ සහන රැසක් ප්‍රකාශයට පත් කරයි

අයහපත් කාලගුණය හේතුවෙන් මෝටර් රථ ප්‍රවාහන දෙපාර්තමේන්තුවේ සේවාවන්ට බාධා

අයහපත් කාලගුණික තත්ත්වය හේතුවෙන් බිඳ වැටුණු මෝටර් රථ ප්‍රවාහන දෙපාර්තමේන්තුවේ පරිගණක පද්ධතිය යථා තත්ත්වයට පත් කිරීමේ කටයුතු තවදුරටත් සිදු කෙරෙමින් පවතින බැවින්, අද (දෙසැම්බර් 01) දින ද සේවාවන් සැපයීමේදී බාධා පවතින බව දෙපාර්තමේන්තුව නිවේදනය කරයි.

මේ හේතුවෙන් වේරහැර ප්‍රධාන කාර්යාලය සහ කුරුණෑගල, කළුතර, හම්බන්තොට, ගම්පහ, අනුරාධපුරය, යාපනය, මොනරාගල, මහනුවර, ගාල්ල හා අම්පාර යන මාර්ගගත (Online) කාර්යාල හරහා බලපත්‍ර මුද්‍රණය හා අලුත් කිරීම වැනි සේවාවන් අද දිනයේ සිදු නොවනු ඇත.

කෙසේ වෙතත්, මහජනතාවගේ පහසුව සඳහා පහත සඳහන් විශේෂ විධිවිධාන අද දින ක්‍රියාත්මක වේ:

1. ලිඛිත පරීක්ෂණ පැවැත්වීම

අද (01) දින සිට සියලුම කාර්යාලවල ලිඛිත පරීක්ෂණ පරිගණක තාක්ෂණය වෙනුවට සාමාන්‍ය ප්‍රශ්න පත්‍ර (Paper-based) යොදාගෙන පැවැත්වීමට කටයුතු යොදා ඇත.

2. මගහැරුණු විභාග සඳහා නව දින (වේරහැර කාර්යාලය)

පද්ධති දෝෂ හා කාලගුණය නිසා වේරහැර කාර්යාලයේ පරිගණක විභාගවලට පෙනී සිටීමට නොහැකි වූ අයදුම්කරුවන් සඳහා නව දිනයන් පහත පරිදි ලබා දී ඇත:

• 2025.11.27 දින පැවැත්වීමට තිබූ විභාග → 2025.12.08 වන දින පැවැත්වේ.
• 2025.11.28 දින පැවැත්වීමට තිබූ විභාග → 2025.12.09 වන දින පැවැත්වේ.

(ඔබගේ වේලාව වෙන්කර ගැනීමේ ලේඛනයේ සඳහන් වේලාවන් හිදීම විභාගය පැවැත්වේ.)

3. මගහැරුණු වේලාවන් (Appointments) සඳහා සහන

නොවැම්බර් 27, 28 සහ දෙසැම්බර් 01 (අද) දින සේවා ලබා ගැනීමට වේලාවන් වෙන්කරවා ගත් නමුත් සේවා ලබා ගැනීමට නොහැකි වූ අයදුම්කරුවන්ට, ඉදිරි සති 02 තුළ ඕනෑම දිනයක පැමිණ තමන්ට අදාළ සේවාවන් ලබා ගැනීමට අවස්ථාව සලසා දී ඇත.

4. අද දිනයේ බාධාවකින් තොරව සැපයෙන සේවාවන්

පද්ධති දෝෂය මධ්‍යයේ වුවද පහත සේවාවන් වේරහැර සහ අනෙකුත් කාර්යාලවලදී අද සිදු කර ගත හැක:

• ප්‍රායෝගික පරීක්ෂණ (Driving Trials).
• තාවකාලික රියදුරු බලපත්‍ර කාලය දීර්ඝ කර ගැනීම.
• ලේජර් තොරතුරු පරීක්ෂා කර ගැනීම.

දිවයින පුරා පිහිටි මාර්ගගත නොවූ (Offline) කාර්යාල හරහා රියදුරු බලපත්‍ර සේවාවන් සාමාන්‍ය පරිදි සිදු කෙරේ.

වාහන ලියාපදිංචි කිරීම හා පැවරීම සාමාන්‍ය පරිදි සිදු වේ.