අයහපත් කාලගුණය හේතුවෙන් කල් ඉකුත් වන රියදුරු බලපත්‍ර අලුත් කර ගැනීමට විශේෂ සහන කාලයක්

දිවයින පුරා පවතින අයහපත් කාලගුණික සහ ස්වාභාවික ආපදා තත්ත්වය හේතුවෙන් මහජනතාවට ඇතිවී තිබෙන දුෂ්කරතා සැළකිල්ලට ගනිමින්, රියදුරු බලපත්‍ර අලුත් කර ගැනීම සඳහා විශේෂ සහන කාලයක් (Grace Period) ලබා දීමට මෝටර් රථ ප්‍රවාහන දෙපාර්තමේන්තුව තීරණය කර ඇත.

මෝටර් රථ ප්‍රවාහන කොමසාරිස් ජනරාල්වරයා විසින් නිකුත් කරන ලද මාධ්‍ය නිවේදනයකට අනුව, මෙම විශේෂ සහනය හිමිවන්නේ 2025.11.25 දින සිට 2025.12.25 දින දක්වා වූ කාලය තුළ කල් ඉකුත් වන (Expire) රියදුරු බලපත්‍ර හිමියන් සඳහාය.

පවතින අයහපත් කාලගුණය නිසා බොහෝ රියදුරන්ට නියමිත දිනට තම බලපත්‍ර අලුත් කර ගැනීම සඳහා කාර්යාල වෙත පැමිණීමට බාධා එල්ල වී ඇති බව නිරීක්ෂණය වී තිබේ. ඒ අනුව, ඉහත සඳහන් කාල සීමාව තුළ කල් ඉකුත් වූ බලපත්‍රයක් ළඟ තබාගෙන රිය පැදවීම මාර්ග නීති උල්ලංඝනය කිරීමක් ලෙස නොසලකන ලෙස ශ්‍රී ලංකා පොලිසිය ඇතුළු අදාළ අංශ වෙත මේ වන විටත් දැනුම් දී ඇත.

මෙම සහන කාලය තුළ අදාළ රියදුරන්ට දඩ මුදල් ගෙවීමකින් හෝ නීතිමය බාධාවකින් තොරව තම බලපත්‍ර අලුත් කර ගැනීමට හැකියාව පවතී. කෙසේ වෙතත්, 2025.12.25 දින වන විට එම කටයුතු අනිවාර්යයෙන්ම අවසන් කර ගත යුතු අතර, ඉන් ඉදිරියට මෙම සහනය භාවිත කරමින් රිය පැදවීමට අවස්ථාවක් නොමැති බව මෝටර් රථ ප්‍රවාහන දෙපාර්තමේන්තුව වැඩිදුරටත් අවධාරණය කරයි.