මෝටර් රථ ප්‍රවාහන දෙපාර්තමේන්තුවෙන් WhatsApp අංකයක්
මෝටර් රථ ප්‍රවාහන දෙපාර්තමේන්තුව විසින් මහජන ලිඛිත පැමිණිලි කඩිනමින් ලබාගැනීම සඳහා වට්ස්ඇප් අංකයක් හඳුන්වාදී ඇත. ඒ අනුව, මෝටර් රථ ප්‍රවාහන දෙපාර්තමේන්තුවේ කොමසාරිස් ජනරාල් වෙත හෝ දෙපාර්තමේන්තුව වෙත ඉදිරිපත් කිරීමට ඇති අභියාචනා හෝ පැමිණිලි ලිඛිතව 071 40 33 300 යන වට්ස්ඇප් අංකයට යොමු කිරීමට හැකියාව ඇත.
මහජනතාව විසින් මෙම අංකය වෙත ලිඛිතව යොමු කරන පැමිණිලි උදෙසා කඩිනමින් අවශ්‍ය පියවර ගැනීමට විධිවිධාන රැසක් දැනටමත් සලසා ඇති බව මෝටර් රථ ප්‍රවාහන කොමසාරිස් ජනරාල් නිශාන්ත අනුරුද්ධ වීරසිංහ මහතා පවසයි.
මේ අතර, TELL DMT facebook පිටුව හරහා ද මෝටර් රථ ප්‍රවාහන දෙපාර්තමේන්තුව හා සම්බන්ධ වීමට සේවාලාභීන්ට තවත් අවස්ථාවක් සලසා ඇති බවද ඒ මහතා වැඩිදුරටත් පැවසීය.
මෙම සේවාව මගින් මහජනතාවගේ පැමිණිලි හා අභියාචනා කාර්යක්ෂමව හසුකර ගැනීමට හා විසඳා දීමට මෝටර් රථ ප්‍රවාහන දෙපාර්තමේන්තුව කටයුතු කරන බවත්, මෙම නව තාක්ෂණික පියවර මගින් සේවාවන් තවදුරටත් පහසු හා ඵලදායී කිරීමට අපේක්ෂා කරන බවත් දෙපාර්තමේන්තුව ප්‍රකාශ කරයි.
