මොකද්ද මේ අධිවේගී මාර්ග වල Multi-lane Free Flow කියන්නෙ?
Motor Guide අපි අද කතා කරන්නෙ ලෝකෙ පුරාම වගේම දැන් අපේ රටේත් කාගෙත් අවධානයට ලක්වෙලා තියෙන, අධිවේගී මාර්ග ක්ෂේත්‍රයේ දකින්න ලැබෙන ඉතාම දියුණු සහ නවීන තාක්ෂණික සංකල්පයක් ගැනයි. ඒ තමයි Multi-lane Free Flow නැත්නම් කෙටියෙන් අපි හැමෝම හඳුන්වන MLFF කියන ක්‍රමවේදය. ඔබ හැමෝම දන්නවා දැනට ලංකාවේ අධිවේගී මාර්ග වලට ඇතුල් වෙද්දි සහ පිටවෙද්දි අපිට සාමාන්‍ය ගේට්ටු ළඟ නතර වෙලා සල්ලි ගෙවන්න සිද්ධ වෙනවා. එහෙමත් නැත්නම් ETC කාඩ් එකක් පාවිච්චි කරලා වාහනයේ වේගය අඩු කරලා, බාධකය ඉවත් වනතුරු පොඩ්ඩක් නතර වෙලා යන්න සිද්ධ වෙනවා. හැබැයි මේ කියන MLFF තාක්ෂණයෙන් වෙන්නෙ ඊට වඩා සම්පූර්ණයෙන්ම වෙනස්, රියදුරන්ට වගේම වාහන වලටත් ඉතාම පහසු දෙයක්. සරලවම කිව්වොත් මේකෙදි වාහන කිසිම තැනක නතර කරන්නෙ නැතුව, තමන්ගෙ සාමාන්‍ය ධාවන වේගයෙන්ම ඉදිරියට යද්දි ස්වයංක්‍රීයවම අදාළ මාර්ග ගාස්තුව අය කරගන්නා ක්‍රමවේදයක් විදියට මේක හඳුන්වන්න පුළුවන්.
Multi-lane Free Flow ක්‍රියාත්මක වෙන්නේ කොහොමද?
මේ ක්‍රමවේදය ක්‍රියාත්මක වෙන්නෙ කොහොමද කියන එක ගැන තාක්ෂණික පැත්තෙන් අපි විස්තරාත්මකව බලන්න ඕනේ. මෙතනදි අධිවේගී මාර්ගයේ තියෙන සාමාන්‍ය මංතීරු සියල්ලම එකවර ආවරණය වන පරිදි පාරට උඩින් විශාල ආරුක්කු හැඩැති කණු පද්ධතියක්, නැත්නම් ඉංජිනේරු විද්‍යාවේදී අපි හඳුන්වන ගැන්ට්‍රි ව්‍යුහයක් සවි කරලා තියෙනවා. මේ ගැන්ට්‍රි එක උඩ ඉතාම ඉහල තාක්ෂණයෙන් යුක්ත අධිවේගී කැමරා, ලේසර් සෙන්සර් වගේම රේඩියෝ තරංග ග්‍රහණය කරගන්න පුළුවන් RFID රීඩර්ස් විශාල ප්‍රමාණයක් සවි කරලයි තියෙන්නෙ.
ඔබ ඔබේ වාහනයෙන් පැයට කිලෝමීටර් සියයක හෝ ඊට වැඩි වේගයෙන් මේ ගැන්ට්‍රි එක යටින් පහු කරලා යද්දි, වාහනය නතර කරන්න තියා වේගය පොඩ්ඩක්වත් අඩු කරන්න අවශ්‍ය වෙන්නෙ නැහැ. වාහනයේ ඉදිරිපස වීදුරුවේ අලවලා තියෙන රේඩියෝ තරංග හඳුනාගැනීමේ ස්ටිකරය හරහා හෝ වාහනයේ අංක තහඩුව ස්කෑන් කිරීම මඟින් පද්ධතිය විසින් ක්ෂණයකින් වාහනය හඳුනා ගන්නවා. ඊට පස්සෙ ඒ වාහනයට අදාළ ඩිජිටල් ගිණුමෙන් ස්වයංක්‍රීයවම මුදල් කපා හැරීම සිද්ධ වෙනවා. මේ මුළු ක්‍රියාවලියම වෙන්නෙ තත්පරයකින් ඉතාම සුළු කොටසක් ඇතුලතයි.
මේකෙ පිටුපස තියෙන තාක්ෂණය මොකක්ද?
මේ ක්ෂේත්‍රයේ ඉන්න අය විදියට අපි නිතරම බලන්නෙ මෙවැනි පද්ධතියක තියෙන නිවැරදිභාවය සහ කාර්යක්ෂමතාවය කොහොමද කියන කාරණාවයි. MLFF පද්ධතියක් ප්‍රධාන තාක්ෂණික කොටස් කිහිපයක එකතුවකින් තමයි තමන්ගේ රාජකාරිය කරන්නෙ. පළවෙනි එක තමයි RFID තාක්ෂණය. වාහනයේ තියෙන ස්ටිකර් එකෙන් නිකුත් කරන රේඩියෝ තරංග මඟින් වාහනය කාගෙද කියලා හඳුනා ගන්නවා. දෙවෙනි වැදගත්ම කොටස තමයි ANPR කියන තාක්ෂණය. මේකෙන් වෙන්නෙ පාරට උඩින් තියෙන අධිවේගී කැමරා මඟින් වාහනයේ අංක තහඩුව ඡායාරූපගත කරලා, ඒකෙ තියෙන අංක කියවා හඳුනා ගැනීමයි. යම් හෙයකින් RFID ස්ටිකරය වැඩ නොකලොත් මේ කැමරා පද්ධතිය හරහා වාහනය හඳුනාගෙන ගාස්තු අය කරගන්න පුළුවන්.
ඊට අමතරව වාහනයේ ප්‍රමාණය සහ බර මැන බලන විශේෂ සෙන්සර් වර්ගත් මේකට පාවිච්චි කරනවා. මොකද කුඩා මෝටර් රථයකට අය කරන ගාස්තුව සහ විශාල බස් රථයකට හෝ ලොරි රථයකට අය කරන ගාස්තුව වෙනස් නිසා, වාහනයේ කාණ්ඩය නිවැරදිව හඳුනා ගැනීම මේ පද්ධතියට අත්‍යවශ්‍ය වෙනවා.
MLFF තාක්ෂණයේ තියෙන වාසි මොනවාද?
දැනට අපි පාවිච්චි කරන සාමාන්‍ය ටෝල් ගේට්ටු ළඟ තියෙන ලොකුම ප්‍රශ්නය තමයි වාහන තදබදය. නිවාඩු දිනවලදී වගේම කාර්යබහුල වේලාවන් වලදී මේ ගේට්ටු ළඟ කිලෝමීටර් ගණන් වාහන පෝලිම් හැදෙනවා අපිට නිතරම දකින්න ලැබෙනවා. හැබැයි MLFF ක්‍රමය ආවම ඒ ප්‍රශ්නය සම්පූර්ණයෙන්ම නැති වෙලා යනවා. වාහන නතර වෙන්නෙ නැති නිසා ගමනාගමනය ඉතාම සුමටව සිද්ධ වෙනවා. මේකෙන් රියදුරන්ගේ වටිනා කාලය විශාල වශයෙන් ඉතිරි කරගන්න පුළුවන් වෙනවා වගේම මානසික පීඩනයත් අඩු වෙනවා.
ඊළඟ වැදගත්ම දේ තමයි ඉන්ධන පිරිමැස්ම සහ වාහනයේ ආයු කාලය රැකගැනීම. වාහනයක් නතර කරලා, ආයෙත් පළවෙනි ගියර් එකෙන් ලෝඩ් එක දීලා පටන් ගනිද්දි විශාල ඉන්ධන ප්‍රමාණයක් වැය වෙනවා වගේම එන්ජිමට සහ ක්ලච් පද්ධතියට ලොකු බරක් වැටෙනවා. MLFF නිසා වාහන එක දිගටම ධාවනය වන නිසා අනවශ්‍ය ලෙස ඉන්ධන නාස්ති වීම වැළකෙනවා. ඒ වගේම වාහන නතර කරලා තියෙද්දි පිටවන දුම ප්‍රමාණය අඩු වන නිසා පරිසර දූෂණයත් අවම කරගන්න පුළුවන් වෙනවා. මාර්ග නඩත්තු කරන ආයතන වලටත් ටෝල් ගේට්ටු නඩත්තු කරන්න සහ සේවකයින් යොදවන්න යන පිරිවැය විශාල වශයෙන් අඩු කරගන්න මේ තාක්ෂණය උදව් වෙනවා.
මේ ක්‍රමය ක්‍රියාත්මක කිරීමේදී ඇතිවන අභියෝග මොනවද?
තාක්ෂණය කොච්චර දියුණු වුණත් මේ වගේ පද්ධතියක් රටක ස්ථාපිත කරද්දි අභියෝග කිහිපයකට මුහුණ දෙන්න සිද්ධ වෙනවා. ප්‍රධානම දේ තමයි මෝටර් රථ ප්‍රවාහන දෙපාර්තමේන්තුවේ දත්ත පද්ධතිය සහ මේ ගාස්තු අය කරන පද්ධතිය එකිනෙකට ඉතාම නිවැරදිව සහ වේගවත්ව සම්බන්ධ වෙන්න ඕනේ. යම් කිසි කෙනෙක් තමන්ගේ ඩිජිටල් ගිණුමේ සල්ලි නැතුව මේ ගැන්ට්‍රි එක යටින් ගියොත්, ඒ වාහනයේ අංකය හරහා අදාළ පුද්ගලයා සොයාගෙන දඩ ගැසීමේ නීතිමය ක්‍රමවේදයක් රටේ තිබෙන්න ඕනේ.
ඒ වගේම අංක තහඩු හොරට වෙනස් කරලා ධාවනය කරන වාහන අල්ලා ගැනීමටත් දියුණු ආරක්ෂිත ක්‍රමවේදයක් තියෙන්න අවශ්‍යයි. අධික වර්ෂාව, තද මීදුම හෝ දූවිලි තියෙන වෙලාවට කැමරා වලට අංක තහඩු පැහැදිලිව පෙනෙන්නෙ නැති වෙන්න පුළුවන් නිසා, ඒ වගේ ස්වභාවික බාධාවන් මඟහරවා ගන්න ඉතාම ඉහල මට්ටමේ කාර්මික උපකරණ මේ සඳහා යොදාගන්න සිද්ධ වෙනවා.
Motor Guide අපේ නිගමනය
ලෝකයේ දියුණු රටවල් වන සිංගප්පූරුව, ඕස්ට්‍රේලියාව, මැලේසියාව සහ යුරෝපයේ බොහෝ රටවල් දැනටමත් මේ MLFF තාක්ෂණය ඉතාම සාර්ථකව පාවිච්චි කරනවා. ඒ රටවල් වල අධිවේගී මාර්ග වල විතරක් නෙවෙයි, ප්‍රධාන නගර ඇතුලත පවා වාහන තදබදය පාලනය කරන්න මේ ක්‍රමය යොදාගන්නවා. අපේ රටේත් ඉදිරියේදී මේ තාක්ෂණය සම්පූර්ණයෙන්ම ක්‍රියාත්මක වුණොත්, දැනට අධිවේගී මාර්ග වල තියෙන පෝලිම් ප්‍රශ්නයට ස්ථිර සහ සාර්ථක විසඳුමක් ලැබෙනවා නොඅනුමානයි. මේක හුදෙක් සල්ලි එකතු කරන ක්‍රමයක් විතරක් නෙවෙයි, රටක ආර්ථිකයේ වේගය වැඩි කරන්නත් සෘජුවම දායක වන නවීන ඉංජිනේරු තාක්ෂණික මෙවලමක් විදියට හඳුන්වන්න පුළුවන්.
ඒ වගේම නවීන වාහන සහ තාක්ෂණය ගැන මෙවැනිම වටිනා තොරතුරු දැනගන්න හැමදාමත් අපේ Motor Guide එක්ක එකතු වෙලා ඉන්න කියලත් මතක් කරනව.
ලියන ලද්දේ
Nisaga Sandaru
A versatile and highly experienced professional, currently an Automobile undergraduate at the University of Jaffna, with strong technical expertise grounded in hands-on work as a technician with SriLankan Airlines Ground Support Equipment (GSE). Holding an Automobile NVQ Level 3 qualification, along with specialized certifications in Vehicle ECU Programming and Diagnosis, and extensive experience in arc welding and vehicle body painting, and well equipped to handle complex automotive, diagnostic, and fabrication-related tasks with a high level of competence.
