ඩිට්වා' සුළි කුණාටුවෙන් විනාශ වූ වාහන සඳහා මෝටර් රථ ප්‍රවාහන දෙපාර්තමේන්තුවෙන් විශේෂ ජංගම සේවාවක්

ශ්‍රී ලංකාවට බලපෑ ‘ඩිට්වා’ (Ditwah) සුළි කුණාටුව හේතුවෙන් ඇති වූ ආපදා තත්ත්වය නිසා විනාශ වූ සහ හානියට පත් වාහන සම්බන්ධයෙන් තොරතුරු රැස් කිරීම මේ වන විට ආරම්භ කර ඇති බව මෝටර් රථ ප්‍රවාහන දෙපාර්තමේන්තුව (DMT) පවසයි.

එම දෙපාර්තමේන්තුවේ කොමසාරිස් ජනරාල් කමල් අමරසිංහ මහතා සඳහන් කළේ, හානියට පත් වාහන සම්බන්ධ ගැටලු නිරාකරණය කිරීම සඳහා 2025 දෙසැම්බර් මස 15 වැනිදායින් පසු දිස්ත්‍රික් මට්ටමින් විශේෂ ජංගම සේවාවක් පැවැත්වීමට අපේක්ෂා කරන බවයි.

රැස් කරනු ලබන තොරතුරු මත පදනම්ව ඉදිරි ක්‍රියාමාර්ග ගන්නා බවත්, හානියට පත් වාහන නැවත භාවිතයට සුදුසු තත්ත්වයේ පවතීද යන්න පිළිබඳව දෙපාර්තමේන්තුව විසින් පරීක්ෂා කිරීමට නියමිත බවත් ඒ මහතා පෙන්වා දුන්නේය.

ආපදාව හේතුවෙන් ඇතැම් පුද්ගලයින්ගේ වාහන මෙන්ම ඊට අදාළ ලියකියවිලිද විනාශ වී ඇති බැවින්, අදාළ ක්‍රියා පටිපාටිවලට යොමු වීමට පෙර අවශ්‍ය තොරතුරු ලබා ගැනීමට කටයුතු කරන බව කොමසාරිස් ජනරාල්වරයා වැඩිදුරටත් පැවසීය.

වාහන හිමිකරුන්ට අනුගමනය කළ යුතු ක්‍රියාපටිපාටිය

• පළමුව තම වසමේ ග්‍රාම නිලධාරිවරයා දැනුවත් කළ යුතුය.
• ග්‍රාම නිලධාරිවරයා විසින් අදාළ පොලිස් ස්ථානාධිපතිවරයා (OIC) දැනුවත් කළ පසු, පොලිස් පැමිණිල්ලක් ගොනු කළ යුතුය.

විමර්ශන ආරම්භ කිරීමට සහ තත්ත්වය කාර්යක්ෂමව කළමනාකරණය කිරීමට නිවැරදි දත්ත ලබා ගැනීමේ වැදගත්කමද කොමසාරිස් ජනරාල්වරයා අවධාරණය කළේය.

දෙපාර්තමේන්තුවේ විශේෂ ඒකක සහ සම්බන්ධතා මාර්ග

පවතින තත්ත්වය හමුවේ දෙපාර්තමේන්තුව වෙත ලැබෙන දුරකථන ඇමතුම් ප්‍රමාණය ඉහළ ගොස් ඇති බැවින්, ඒ සඳහා විසඳුමක් ලෙස විශේෂ ඒකකයක් ස්ථාපිත කර ඇත.

ඊට අමතරව පහත සඳහන් WhatsApp අංකය හරහාද අදාළ තොරතුරු ලබා දිය හැක.

WhatsApp අංකය: 070 71 88 866

ප්‍රධාන උපදෙස්

තම වාහන හෝ ලියකියවිලි සම්බන්ධයෙන් යම් සාක්ෂියක් ඉතිරිව ඇත්නම්, ඉදිරි කටයුතු සඳහා සහාය වනු පිණිස ඒවා ආරක්ෂා කර තබා ගන්නා ලෙසද කොමසාරිස් ජනරාල්වරයා මහජනතාවට උපදෙස් ලබා දී ඇත.