Heads-Up Display ගැන හරියට දැනගමු.
Motor Guide අපි අද කතා කරන්න යන්නෙ රිය පැදවීමේදී අපේ ආරක්ෂාව 100%ක්ම තහවුරු කරන්න උදව් වෙන, ඒ වගේම මීට කලින් ලෝකයේ සුපිරිම fighter jets හෙවත් ප්‍රහාරක ගුවන් යානාවල විතරක් දකින්න ලැබුණු පට්ටම තාක්ෂණික පහසුකමක් ගැනයි. ඒ තමයි නවීන වාහන රැසක දකින්න ලැබෙන Heads-Up Display හෙවත් HUD තාක්ෂණය. අපි හැමෝම දන්නවා වාහනයක් පදවනකොට පාරේ තියෙන ට්‍රැෆික් එක සහ බාධක ගැන නිරන්තරයෙන් අවධානයෙන් ඉන්න එක කොච්චර වැදගත්ද කියලා. හැබැයි වාහනයේ වේගය බලන්න හරි, navigation map එක බලන්න හරි හැමතිස්සෙම පහළ තියෙන dashboard එක දිහා හෝ center screen එක දිහා බලනකොට තත්පර කිහිපයකට අපේ අවධානය පාරෙන් ගිලිහී යනවා. අන්න ඒ වගේ අවස්ථාවලදී සිදුවන මාරාන්තික අනතුරු වළක්වා ගන්න, පාරෙන් ඇස් ඉවතට ගන්නේ නැතුවම සියලුම දත්ත බලාගන්න ලැබුණු සුපිරිම විසඳුමක් විදිහට මේ ක්‍රමය හඳුන්වන්න පුළුවන්. අද අපි මේ පද්ධතිය වැඩ කරන්නේ කොහොමද සහ මෙහි තියෙන සැබෑ ප්‍රයෝජන මොනවාද කියලා තේරුම් ගනිමු.
සරලවම කිව්වොත්, Heads-Up Display කියන්නේ වාහනයේ වේගය, ගියර් මට්ටම, ඉන්ධන ප්‍රමාණය වගේම navigation directions වැනි අත්‍යවශ්‍ය සියලුම ධාවන දත්ත, රියදුරුට කෙළින්ම පෙනෙන පරිදි ඉදිරිපස වීදුරුව මත හෙවත් windshield එක මත ආලෝක තරංග මඟින් ප්‍රක්ෂේපණය කර පෙන්වන ඉලෙක්ට්‍රොනික පද්ධතියක්. මෙහිදී රියදුරුට තමන්ගේ හිස පහත් කර dashboard එක දෙස බැලීමට අවශ්‍ය නොවන නිසා, හිස කෙළින් තබාගෙනම එනම් heads up තත්ත්වයෙන්ම දත්ත කියවීමට හැකි වීම නිසා තමයි මෙයට මේ නම ලැබිලා තියෙන්නේ. මේ ක්ෂේත්‍රයේ ඉන්න අය විදියට අපි දකින දෙයක් තමයි, BMW, Mercedes Benz, Toyota, Mazda වගේම වර්තමානයේ එන බොහෝ නවීන වාහනවල මෙම තාක්ෂණය ඉතාම ඉහළ මට්ටමකින් භාවිත කරමින් ධාවන ආරක්ෂාව අතිශය ඉහළ තලයකට ඔසවා තබන්න ඉංජිනේරුවන් කටයුතු කරලා තිබෙනවා.
මේ පද්ධතිය පිටුපස dashboard එක ඇතුළත සඟවා ඇති ප්‍රබල LED projector එකක්, සුවිශේෂී මතුපිට හැඩතල සහිත mirrors හෙවත් දර්පණ ජාලයක් සහ ඉදිරිපස වීදුරුවේ අන්තර්ගත වන polarized මතුපිටක් මෙහි අඩංගු වෙනවා. වාහනයේ instrument cluster එකෙන් සහ පරිගණකයෙන් ලැබෙන දත්ත ප්‍රධාන HUD control unit එක මඟින් ග්‍රහණය කරගත්තාට පස්සේ, මේ මුළු ක්‍රියාවලියම සිද්ධ වෙන්නේ ඉතාම වේගවත් පියවර කිහිපයකින්.
නූතන වාහනවල එන HUD පද්ධති මූලිකවම ප්‍රධාන තාක්ෂණික ක්‍රමවේද දෙකක් යටතේ දකින්න ලැබෙනවා.
පළමුවැන්න තමයි combiner HUD ක්‍රමය. මෙහිදී dashboard එක මතුපිටින් කුඩා ප්ලාස්ටික් හෝ වීදුරු තහඩුවක් (Combiner screen) ස්වයංක්‍රීයව ඉහළට මතු වන අතර, ප්‍රොජෙක්ටරයෙන් නිකුත් කරන ආලෝකය එම තහඩුව මත වැදී දත්ත දර්ශනය වෙනවා. මෙය සාපේක්ෂව නිෂ්පාදන පිරිවැය අඩු ක්‍රමයක් වන අතර බොහෝ මැද පෙළේ වාහනවල දැකගත හැකියි.
දෙවැනි ක්‍රමය තමයි සැබෑ windshield HUD තාක්ෂණයයි. මෙහිදී කිසිදු බාහිර තහඩුවක් නොමැතිව කෙළින්ම වාහනයේ ඉදිරිපස විශාල වීදුරුව මතටම දත්ත යොමු කරනවා. මෙම ක්‍රමයේදී දත්ත ද්විත්ව රූප (Ghost images) ලෙස පෙනීම වැළැක්වීමට, windshield එක ඇතුළත PVB හෙවත් polyvinyl butyral නැමැති විශේෂිත තුනී පටලයක් නිෂ්පාදන අවස්ථාවේදීම අන්තර්ගත කිරීමට ඉංජිනේරුවන් වගබලා ගන්නවා.
තවද, වර්තමානයේ එන අති නවීනතම වාහනවල augmented reality HUD හෙවත් AR-HUD පද්ධති දැකගත හැකියි. මේවා සාමාන්‍ය පද්ධති වගේ නෙවෙයි, වාහනයේ ආරක්ෂක කැමරා සහ radar පද්ධති සමඟ සෘජුවම සම්බන්ධ වෙලයි තියෙන්නේ. උදාහරණයක් විදිහට, ඔබ පාරේ වංගුවක් ගන්නා විට, ඔබ හැරවිය යුතු නිවැරදි මාර්ගය සැබෑ පාර මතුපිට ඩිජිටල් ඊතල (Virtual arrows) මඟින් වීදුරුව හරහා පෙන්වනු ලබනවා. එසේම ඉදිරියෙන් යන වාහනය ඕනෑවට වඩා ළඟා වුවහොත් එම වාහනය වටා රතු පැහැති සලකුණක් windshield එක මත මතු කර පෙන්වමින් දැඩි ලෙස දැනුවත් කරනවා.
මේ නවීන තාක්ෂණය නිසා ප්‍රායෝගික ජීවිතයේදී අපිට ලැබෙන වාසි සහ පහසුව අතිමහත්. ප්‍රධානම වාසිය තමයි රියදුරුගේ ඇස්වලට සිදුවන වෙහෙස (Eye strain) අවම කිරීමයි. පාර දෙස බලා සිටින ඇස්, නැවත පහළ ඇති මීටර් බෝඩ් එක දෙස බලන විට ඇසේ කාචයේ නාභි දුර (Focus) වෙනස් කිරීමට සිදුවන නිසා ඇස් ඉක්මනින් මහන්සි වෙනවා. හැබැයි HUD එකක් ඇති විට දත්ත පාර මතුපිට පාවෙනවා වගේ (Virtual image distance) පෙනෙන නිසා ඇස්වල ෆෝකස් එක වෙනස් කරන්න අවශ්‍ය වෙන්නේ නැහැ. දෙවැන්න නම් රාත්‍රී කාලයේදී අධික වේගයෙන් ධාවනය වන විට පාරෙන් අවධානය ගිලිහී යාම වළක්වා අනතුරු අවදානම විශාල වශයෙන් අඩු කිරීමයි.
Motor Guide අපේ උපදෙස නම්, ඔබේ වාහනයේ HUD පද්ධතියක් තිබේ නම්, එහි ඇති brightness සහ display position එක ඔබේ ආසන මට්ටමට (Seating position) ගැලපෙන පරිදි infotainment පද්ධතිය හරහා නිවැරදිව සකස් කරගන්නා ලෙසයි. එමෙන්ම, කිසියම් හේතුවකින් ඔබේ වාහනයේ ඉදිරිපස වීදුරුව කැඩී ගියහොත්, එය ප්‍රතිස්ථාපනය කිරීමේදී සාමාන්‍ය අඩු මිල වීදුරු භාවිත නොකර, HUD තාක්ෂණය සඳහාම නිෂ්පාදනය කළ නිල OEM හෙවත් original equipment manufacturer windshield එකක්ම පමණක් භාවිත කිරීමට වගබලා ගන්න. මන්ද සාමාන්‍ය වීදුරු දැම්මොත් HUD දත්ත අපැහැදිලි වීම හෝ double vision ලෙඩ මතුවී ඔබේ ඇස්වලට දැඩි අපහසුතාවයක් ඇතිවෙන්න පුළුවන් නිසා.
ඒ වගේම නවීන වාහන සහ තාක්ෂණය ගැන මෙවැනිම වටිනා තොරතුරු දැනගන්න හැමදාමත් අපේ Motor Guide එක්ක රැඳී ඉන්න කියලත් මතක් කරනව.
ලියන ලද්දේ
Nisaga Sandaru
A versatile and highly experienced professional, currently an Automobile undergraduate at the University of Jaffna, with strong technical expertise grounded in hands-on work as a technician with SriLankan Airlines Ground Support Equipment (GSE). Holding an Automobile NVQ Level 3 qualification, along with specialized certifications in Vehicle ECU Programming and Diagnosis, and extensive experience in arc welding and vehicle body painting, and well equipped to handle complex automotive, diagnostic, and fabrication-related tasks with a high level of competence.
