Honda සහ Nissan සමාගම් එක්ව තීරණයක් ගනියි

මෝටර් සයිකල් නිෂ්පාදනයේ ලොව ප්‍රමුඛයා කවුද යැයි විමසුවහොත් අපි හැමෝම ඊට දෙන පිළිතුර තමයි ‘Honda'. වාර්තා වල සඳහන් වන පරිදි Honda මෝටර් සයිකල් නිෂ්පාදනයෙන් ලොව ප්‍රමුඛයා බවට පත්ව සිටින්නේ 1959 වසරේ සිටයි. 2019 වන විට පමණක් මිලියන 400ක පමණ නිෂ්පාදන ප්‍රමාණයක් සිදුකර ඇති බවයි සඳහන් වන්නේ. 2001 දී පමණ ජපානයේ මෝටර් රථ නිෂ්පාදනයෙහි දෙවැනි තැනට පත්වූයේ ‘Honda' නාමයයි. එමෙන්ම 2015 පමණ වනවිට ලොව මෝටර් රථ සහ මෝටර් සයිකල් නිෂ්පාදනයෙහි අටවැනි තැන පසුවූ Honda 2020 වනවිට ලෝකයේ මෝටර් රථ නිෂ්පාදන ක්‍රියාවලියේ දෙවැනියා බවට පත් වුණා.

ඉතින් මේ Honda සමාගම ජපානයේ තෙවැනි විශාලතම මෝටර් සමාගම වන Nissan මෝටර් රථ සමාගම සමඟ එකතු වීමට තීරණය කර තිබෙනවා.

කෙටියෙන්ම කිව්වොත් විද්‍යුත් වාහන නිෂ්පාදනය වැඩිදියුණු කිරීම සඳහා මෙන්ම ස්වයංක්‍රීය තාක්ෂණය ඊට එකතු කිරීම සඳහා එක්ව කටයුතු කිරීමටයි Honda සහ Nissan සමාගම් තීරණය කර තිබෙන්නේ.

ජපානයේ ටෝකියෝ නුවර පැවති මාධ්‍ය සාකච්ඡාවකට එක් වෙමින් එම සමාගම්වල ප්‍රධානීන් මේ බව ප්‍රකාශ කළා.

ඉදිරියේදී තාක්ෂණයෙන් වැඩිදියුණු වූ විද්‍යුත් වාහන නිර්මාණය කිරීමට එම සමාගම් කටයුතු කරන බවයි විදෙස් මාධ්‍ය වාර්තා කළේ. එහෙනම් අපි බලාගෙන ඉමු ඉදිරියේදී මොකද වෙන්නේ කියලා.