අද කාලෙ හැම වාහනේම වගේ තියන Auto High Beam
Motor Guide අපි අද කතා කරන්නෙ අද කාලෙ ගොඩක් අලුත් වාහනවල අපිට දකින්න ලැබෙන, හැබැයි හරිහැටි අවබෝධයක් නැතුව පාවිච්චි කළොත් කරදරයක් වෙන්න පුළුවන් අපූරු තාක්ෂණයක් ගැන. ඒ තමයි 'Auto High Beam' (AHB) එහෙම නැත්නම් 'High Beam Assist' කියන සිස්ටම් එක.
මේක ඇත්තටම රියදුරාට ලොකු පහසුවක් වෙන්න හදපු දෙයක් වුණාට, මේක වැඩ කරන විදිය සහ මේකෙ සීමාවන් ගැන දැනගෙන ඉන්න එක පාරෙ යන අනිත් අයගෙත් ඔයාලගෙත් ආරක්ෂාවට ගොඩක් වැදගත් වෙනවා.
Auto High Beam එකෙන් වෙන්නේ මොකක්ද?
මුලින්ම බලමු මේකෙන් වෙන්නෙ මොකක්ද කියලා. සරලවම කිව්වොත්, රෑට වාහනය පදවනකොට ඉදිරියෙන් වාහනයක් එන්නෙ නැති වෙලාවට හෝ ඉදිරියෙන් වෙනත් වාහනයක් ගමන් කරන්නේ නැති වෙලාවට, වාහනයේ headlamp එක ඉබේම High Beam එකට මාරු වෙනවා. ඒ වගේම ඉදිරියෙන් තවත් වාහනයක එළියක් පෙනුන ගමන් තත්පර ගාණකින් මේක ආපහු Low Beam එකට මාරු කරනවා. මේකෙ ප්රධාන අරමුණ වෙන්නෙ රියදුරාට පාර පේන පරාසය උපරිම මට්ටමක තියාගන්න උදව් කරන එකයි. මොකද ගොඩක් වෙලාවට අපි හයිබීම් දාන්න මැලි වෙනවා ආපහු ලෝබීම් කරන්න අමතක වෙයි කියලා, නැත්නම් ඒක කරදරයක් කියලා හිතලා. ඒ නිසා මේ සිස්ටම් එක හරහා ඒ වගකීම වාහනය විසින්ම භාර ගන්නවා.
මේ තාක්ෂණය ක්රියාත්මක වන ආකාරය
මේ තාක්ෂණය කොහොමද ක්රියාත්මක වෙන්නෙ කියලා බැලුවොත්, මෙතනදි ප්රධානම කාර්යය කරන්නෙ වාහනයේ ඉදිරි වීදුරුවේ (Windshield) ඉහළ මැද හරියට වෙන්න හයි කරලා තියෙන කැමරා පද්ධතියක්.
මේක සාමාන්යයෙන් අපේ ඇසට පෙනෙන ආලෝකය වගේම වාහනවල තියෙන 'Tail lights' සහ 'Headlights' හඳුනාගන්න පුළුවන් විදියට තමයි නිර්මාණය කරලා තියෙන්නෙ. ඔබ වාහනය පදවනකොට මේ කැමරාව මගින් ඉදිරියෙන් එන ආලෝක ධාරාවන් නිරන්තරයෙන් විශ්ලේෂණය කරනවා. යම් කිසි මට්ටමකට වඩා අඩු ආලෝකයක් පාරෙ තියෙනවා නම් සහ ඉදිරියෙන් කිසිදු වාහනයක් නැත්නම්, පරිගණකය මගින් Headlight එකට සංඥාවක් යවනවා හයිබීම් එක ක්රියාත්මක කරන්න කියලා.
පද්ධතියේ සීමාවන් සහ අවදානම්
හැබැයි මේක හැම වෙලාවෙම 100% ක් නිවැරදිව වැඩ කරයි කියලා හිතන්න එපා. මේ ක්ෂේත්රයේ ඉන්න අය විදියට අපි දන්නවා මේ පද්ධතියට බලපාන බාහිර සාධක ගොඩක් තියෙනවා කියලා. උදාහරණයක් විදියට වැස්ස වෙලාවට, මීදුම තියෙන වෙලාවට නැත්නම් පාර අයිනෙ තියෙන ලොකු නාමපුවරු වලින් ආලෝකය පරාවර්තනය වෙනකොට මේ කැමරාවට වැරදි සංඥා ලැබෙන්න පුළුවන්. සමහර වෙලාවට ඉදිරියෙන් එන වාහනයක ලයිට් පවර් එක අඩු නම් හෝ පරණ වාහනයක් නම්, කැමරාව ඒක හඳුනාගන්න පරක්කු වෙන්න පුළුවන්. ඒ වගේ වෙලාවට ඉදිරියෙන් එන රියදුරා අපහසුතාවයට පත්වෙනවා. ඒ නිසා Auto High Beam දාලා තිබුණත් හැමවෙලාවෙම අවධානයෙන් ඉන්න එක ගොඩක් වැදගත්.
වේග සීමාවන් සහ පරිසර තත්ත්වයන්
තවත් දෙයක් තමයි මේ සිස්ටම් එක හැම වේගයකදීම වැඩ කරන්නෙ නැහැ. සාමාන්යයෙන් වාහනය පැයට කිලෝමීටර් 30-40 කට වඩා වැඩි වේගයකින් යනකොට තමයි මේක ක්රියාත්මක වෙන්නෙ. ඒ වගේම නාගරික ප්රදේශවල වීදි ලාම්පු එළිය තදින් තියෙන තැන්වලදී මේක වැඩ කරන්නෙ නැහැ. මොකද සිස්ටම් එක තේරුම් ගන්නවා පාරට ප්රමාණවත් ආලෝකයක් තියෙනවා කියලා. මේකෙන් වෙන්නෙ අනවශ්ය විදියට පාරෙ යන අනිත් අයගෙ ඇස් නිලංකාර වෙන එක වැළකෙන එකයි. ඉතින් මේක හරිම බුද්ධිමත් පද්ධතියක් වුණාට, ලංකාව වගේ වංගු සහිත පාරවල් තියෙන රටක මේක පාවිච්චි කරද්දි ටිකක් පරිස්සම් වෙන්න ඕන. වංගුවකින් වාහනයක් මතු වෙනකොට කැමරාවට ඒක පේන්න කලින් ලයිට් එක වංගුවෙන් එහා පැත්තෙ රියදුරාට වැදෙන්න පුළුවන්.
අපි පාවිච්චි කරන වාහනයේ තියෙන්නෙ සාමාන්ය Auto High Beam එක නම්, ඒකෙ ක්රියාවලිය ගැන අපිට හොඳ අවබෝධයක් තියෙන්න ඕන.
වීදුරුව පිරිසිදුව තබා ගැනීමේ වැදගත්කම
මෝටර් රථ ක්ෂේත්රයේ ඉන්න අය විදියට අපි දකින තවත් ගැටලුවක් තමයි වාහනයේ ඉදිරි වීදුරුව අපිරිසිදු වෙලා තිබීම. කැමරාව තියෙන හරිය මඩ වෙලා හෝ පින්න බැඳිලා තිබුණොත් මේ සිස්ටම් එක වැඩ කරන්නෙ නැහැ, නැත්නම් වැරදියට වැඩ කරයි. ඒ නිසා හැම වෙලාවෙම වාහනයේ වීදුරුව පිරිසිදුව තබා ගැනීම මේ වගේ සේෆ්ටි ෆීචර්ස් නිවැරදිව වැඩ කරන්න අත්යවශ්යයි. ඒ වගේම වාහනයේ හෙඩ් ලයිට් එකේ 'Leveling' එක හරියට තියෙන්නත් ඕන. ලයිට් එක වැඩිය උඩට ගිහින් තිබුණොත් ලෝබීම් එකේදී පවා ඉදිරියෙන් එන අයට කරදරයක් වෙන්න පුළුවන්.
Motor Guide අපේ උපදෙස
Motor Guide අපේ උපදෙස තමයි, නවීන තාක්ෂණය කියන්නෙ අපේ පහසුවට තියෙන දෙයක් මිසක් අපේ අවධානය සම්පූර්ණයෙන්ම අයින් කරන්න තියෙන දෙයක් නෙවෙයි. 'Auto High Beam' කියන්නෙ රියදුරාට සහාය දෙන (Driver Assist) පද්ධතියක් විතරයි. ඒ නිසා රෑට වාහනය පදවනකොට සිස්ටම් එක ඕෆ් කරන්න ඕන වෙලාවට ඒක මැනුවල් කරන්න ඔබ සූදානම් වෙලා ඉන්න ඕන. විශේෂයෙන්ම පටු පාරවල් වල සහ වංගු සහිත පාරවල් වලදී මේ ගැන දෙපාරක් හිතන්න. තාක්ෂණය නිවැරදිව පාවිච්චි කරන එක ඔබේත්, පාරෙ යන අනිත් අයගෙත් ආරක්ෂාවට හේතු වෙනවා. ඒ වගේම නවීන වාහන සහ තාක්ෂණය ගැන මෙවැනිම වටිනා තොරතුරු දැනගන්න හැමදාමත් Motor Guide අපි එක්ක රැඳී ඉන්න අමතක කරන්න එපා.
ලියන ලද්දේ
Nisaga Sandaru
A versatile and highly experienced professional, currently an Automobile undergraduate at the University of Jaffna, with strong technical expertise grounded in hands-on work as a technician with SriLankan Airlines Ground Support Equipment (GSE). Holding an Automobile NVQ Level 3 qualification, along with specialized certifications in Vehicle ECU Programming and Diagnosis, and extensive experience in arc welding and vehicle body painting, and well equipped to handle complex automotive, diagnostic, and fabrication-related tasks with a high level of competence.
