අද වෙද්දි ලංකාවෙත් ගොඩක් ජනප්‍රිය මොනවද මේ K car?
Motor Guide අපි අද කතා කරන්න යන්නෙ මේ දවස්වල ලංකාවෙ පාරවල හරිම ජනප්‍රිය වෙලා තියෙන, හැමෝම වගේ කතා වෙන K car කියන වාහන වර්ගය ගැනයි. සාමාන්‍ය වාහන වලට වඩා වෙනස් පෙනුමකින් සහ අඩුවෙන් ඉන්ධන පාවිච්චි වෙන විදිහට හැදිලා තියෙන මේ පුංචි වාහන ගැන හරියටම දැනගන්න එක ගොඩක් වැදගත්.
K car සංකල්පයේ ආරම්භය
සාමාන්‍යයෙන් K car කියන සංකල්පය මුලින්ම ආවෙ ජපානෙට. ජපාන රජය විසින් වාහන තදබදය පාලනය කරන්න සහ ඉන්ධන අරපිරිමැස්මෙන් පාවිච්චි කරන්න පුළුවන් විදිහට විශේෂ නීති රීති පද්ධතියක් යටතේ හදපු වාහන කාණ්ඩයක් තමයි මේ විදිහට හැඳින්වෙන්නේ. ඉතින් ජපානෙ පාවිච්චි කරලා ලංකාවට ගෙනාපු වාහන සහ අලුත් K car වර්ග දැන් අපේ රටෙත් ගොඩක් දෙනෙක්ගේ ප්‍රියතම තේරීමක් බවට පත්වෙලා තියෙනවා.
තාක්ෂණික පසුබිම සහ ක්‍රියාකාරීත්වය
තාක්ෂණික පැත්තෙන් බැලුවම මේවායේ තියෙන්නේ ඉතාම කුඩා එන්ජින් ධාරිතාවක්. බහුතරයක් K car වල එන්ජින් ධාරිතාව 660cc වගේ ප්‍රමාණයකට සීමා වෙනවා. හැබැයි මේ පොඩි එන්ජිම නිසා වාහනේ බලය අඩුයි කියල හිතන්න එපා. මේ ක්ෂේත්‍රයේ ඉන්න අය විදියට අපි දැකලා තියෙනවා, නවීන තාක්ෂණය යටතේ හදන මේ එන්ජින් වලට ටබෝචාජර් (Turbocharger) තාක්ෂණය එකතු කරලා තියෙන නිසා හොඳ පිකප් එකක් සහ වේගයක් මේවයින් ලබාගන්න පුළුවන් කියලා.
සාමාන්‍යයෙන් මේ වාහන වල සිලින්ඩර් සංඛ්‍යාව 3ක් වෙන අතර, බරින් අඩු වීම සහ වායු ගතික (Aerodynamic) හැඩය නිසා වැඩි තෙල් පාරෝජනයක් නැතුව කිලෝමීටර් ගණනාවක් දුවන්න පුළුවන්කම ලැබෙනවා.
ඇතුළත ඉඩකඩ සහ පහසුව
භාවිතා කරන ප්‍රමාණයෙන් කුඩා වුණත්, මේ වාහන වල ඇතුළත ඉඩකඩ ගැන පුදුම වෙන්න වෙනවා. ජපාන ඉංජිනේරුවන් මේවා නිර්මාණය කරලා තියෙන්නේ උපරිම ඉඩකඩක් ලැබෙන විදිහට. උසින් වැඩි නිසා උස මනුෂ්‍යයෙකුට වුණත් කිසිම අපහසුවක් නැතුව සැපපහසුව වාඩි වෙලා යන්න පුළුවන්. ඒ වගේම බඩු බාහිරාදිය දාන්න පුළුවන් විදිහේ සීට් මාරුකිරීමේ පහසුකම් මේවායේ තියෙනවා. නගරය තුළ ඩ්‍රයිව් කරන්න, වාහන නවත්වන්න (Parking) හරිම ලේසියි. තදබදය අතරින් රිංගලා යන්න පුළුවන් මට්ටමක තමයි මේවා හැදිලා තියෙන්නේ.
ආරක්ෂාව සහ ඉන්ධන කාර්යක්ෂමතාව
ආරක්ෂාව සහ පහසුකම් අතින් ගත්තම, අද එන නවීන K car වල විශාල වාහන වලටත් වඩා වැඩියෙන් ආරක්ෂක විශේෂාංග තියෙනවා. Lane keep assistant පද්ධති, ස්වයංක්‍රීය තිරිංග පද්ධති (Automatic Braking Systems), සහ Airbag ගණනාවක් මේවට එකතු කරලා තියෙනවා. මේකෙන් පුංචි වාහනයක් වුණත් රියැදුරුට සහ මගීන්ට උපරිම ආරක්ෂාවක් දෙනවා කියන එක පැහැදිලියි. ඉන්ධන කාර්යක්ෂමතාව ගැන කතා කරනකොට, ලීටරයකට කිලෝමීටර් 20ත් 30ත් අතර ප්‍රමාණයක් යන්න පුළුවන් වීම අද වගේ තෙල් මිල ඉහළ ගිය කාලෙකට මාරම වාසියක්.
අවම නඩත්තු වියදම
මේ වාහන වල නඩත්තු කිරීමේ වියදම ගොඩක් අඩුයි. ස්පෙයාර් පාර්ට්ස් වෙළඳපොලේ පහසුවෙන් හොයාගන්න පුළුවන් වීමත්, අලුත්වැඩියා කරන්න දක්ෂ කාර්මිකයන් ඉන්න එකත් ලංකාවට මේවා ගැලපීමට ලොකු හේතුවක් වෙලා තියෙනවා. මූලික මිලදී ගැනීමේදී යම්කිසි මුදලක් ගියත්, දිගුකාලීනව ඉන්ධන වලින් සහ නඩත්තුවෙන් ඉතිරිකරගන්න පුළුවන් මුදලත් එක්ක මේක ආයෝජනයක් විදිහටත් පාඩු නැහැ.
Motor Guide අපේ උපදෙස
Motor Guide අපේ උපදෙස තමයි, ඔබත් K car එකක් මිලදී ගන්න හිතනවා නම්, මුලින්ම වාහනයේ තත්ත්වය, මයිලේජ් එක සහ ජපාන ඕක්ෂන් ශීට් (Auction Sheet) එක හරියටම පරීක්ෂා කරලා බලන්න කියන එක. ගොඩක් වෙලාවට අඩු මිලට දෙන වාහන වල සැඟවුණු දෝෂ තියෙන්න පුළුවන් නිසා විශ්වාසවන්ත තැනකින් වාහනයක් තෝරා ගැනීම ගොඩක් වැදගත්. ඒ වගේම ටබෝ (Turbo) එන්ජින් තියෙන වාහන පාවිච්චි කරනකොට එන්ජින් ඔයිල් නියමිත වෙලාවට මාරු කිරීම වැනි නඩත්තු කටයුතු නිසි පරිදි කිරීමෙන් වාහනයේ ආයු කාලය ගොඩක් වැඩි කරගන්න පුළුවන්. ඒ වගේම නවීන වාහන සහ තාක්ෂණය ගැන මෙවැනිම වටිනා තොරතුරු දැනගන්න හැමදාමත් අපේ Motor Guide එක්ක රැඳී ඉන්න කියලත් මතක් කරනව.
ලියන ලද්දේ
Nisaga Sandaru
A versatile and highly experienced professional, currently an Automobile undergraduate at the University of Jaffna, with strong technical expertise grounded in hands-on work as a technician with SriLankan Airlines Ground Support Equipment (GSE). Holding an Automobile NVQ Level 3 qualification, along with specialized certifications in Vehicle ECU Programming and Diagnosis, and extensive experience in arc welding and vehicle body painting, and well equipped to handle complex automotive, diagnostic, and fabrication-related tasks with a high level of competence.
