Cold start කරනකොට engine එක warm කරන්න ඕනෙද?

වාහනයක් පාවිච්චි කරන කෙනෙක් විදිහට "Cold Start" එකකදී එන්ජිම රත් කරන එක ගැන තියෙන කුතුහලය සාධාරණයි. ඉස්සර කාලේ වාහන වලට නම් මේක අනිවාර්ය දෙයක් වුණාට, අද තියෙන නවීන තාක්ෂණයත් එක්ක මේකේ ලොකු වෙනසක් වෙලා තියෙනවා. Motor Guide අපි මුලින්ම පැහැදිලි කරන්නම් ඇයි අපි එන්ජිමක් "Warm up" කරන්න ඕනේ කියලා. එන්ජිම ඇතුළේ තියෙන ලෝහ කොටස් එකිනෙක ගැටෙමින් තමයි වැඩ කරන්නේ. මේ කොටස් අතරේ ලිහිසි තෙල් (Engine Oil) තට්ටුවක් තියෙන්නම ඕනේ. වාහනය පැය කිහිපයක් නවත්තලා තියෙද්දී මේ ඔයිල් ඔක්කොම පහළ තියෙන ඔයිල් පෑන් (Oil Pan) එකට බැහැලා තියෙන්නේ. ඉතින් ආයෙත් ස්ටාර්ට් කරපු ගමන්ම එන්ජිමේ ඉහළ කොටස් වලට ඔයිල් යන්න පොඩි වෙලාවක් යනවා.

පරණ කාර්බියුරේටර් (Carburetor) තියෙන වාහන වල නම් එන්ජිම රත් වෙනකම් ඒක හරියට වැඩ කරන්නේ නැහැ. මොකද ඉන්ධන සහ වාතය මිශ්‍ර වෙන එක රඳා පවතින්නේ එන්ජිමේ උෂ්ණත්වය මතයි. ඒ නිසා ඒ කාලේ විනාඩි 5ක් 10ක් එන්ජිම රත් කරන එක අනිවාර්ය වුණා. හැබැයි දැන් තියෙන වාහන වල තියෙන්නේ EFI (Electronic Fuel Injection) තාක්ෂණය. මෙතනදී එන්ජිමේ තියෙන සෙන්සර් (Sensors) මගින් එළියේ උෂ්ණත්වය සහ එන්ජිමේ උෂ්ණත්වය මැනලා, ඒකට ගැළපෙන විදිහට ඉන්ධන ප්‍රමාණය පාලනය කරනවා. ඒ නිසා නවීන වාහනයක් ස්ටාර්ට් කරපු ගමන්ම ධාවනය කරන්න පුළුවන් මට්ටමේ තියෙන්නේ.

ඇත්තටම කොච්චර වෙලාවක් රත් කරන්න ඕනෙද?

ඇත්තම කිව්වොත්, නවීන වාහනයක එන්ජිම රත් කරන්න විනාඩි ගණන් ඉන්න ඕනේ නැහැ. ඔයා වාහනය ස්ටාර්ට් කරලා තත්පර 30ක් හෝ උපරිම විනාඩියක් වගේ කාලයක් තියන්න. ඒ කාලය ඇති එන්ජින් ඔයිල් පොම්පය මගින් එන්ජිමේ හැම තැනකටම ඔයිල් ටික යවන්න. ඔයාට පෙනෙයි වාහනය ස්ටාර්ට් කරපු ගමන් RPM (Revolutions Per Minute) එක ටිකක් වැඩියෙන් තියෙනවා. ඒක තත්පර කිහිපයකින් ටිකක් පහළට බහිනවා. අන්න ඒ වෙලාව තමයි වාහනය ධාවනය කරන්න පටන්ගන්න හොඳම වෙලාව.

අනවශ්‍ය විදිහට විනාඩි 10-15 එන්ජිම "Idle" එකේ තියලා රත් කරන එකෙන් වෙන්නේ වාහනයේ ඉන්ධන අපතේ යන එක විතරයි. ඒ වගේම පරිසරයට පිට කරන අහිතකර වායු ප්‍රමාණයත් වැඩි වෙනවා. නවීන එන්ජිමක කොටස් රත් වෙන්න හොඳම ක්‍රමය තමයි වාහනය ධාවනය කරන එක. හැබැයි මෙතනදී ඉතාම වැදගත් කරුණක් තියෙනවා. වාහනය පාරට ගත්ත ගමන්ම වේගයෙන් රේස් කරන්න හෝ අධික වේගයෙන් යන්න එපා. එන්ජිමේ උෂ්ණත්වය පෙන්වන කටුව (Temperature Gauge) සාමාන්‍ය මට්ටමට එනකම් ඉතාම සෙමින් සහ අඩු වේගයකින් ධාවනය කරන්න ඕනේ. එතකොට තමයි එන්ජිම වගේම ගියර් පද්ධතියත් (Transmission) ක්‍රමයෙන් රත් වෙලා හොඳ ක්‍රියාකාරීත්වයකට එන්නේ.

තාක්ෂණිකව බලපෑම වෙන්නේ කොහොමද?

අපි එන්ජිම ස්ටාර්ට් කරපු ගමන්ම අධික ලෙස රේස් (Revving) කළොත් වෙන්නේ මොකක්ද? එන්ජින් ඔයිල් තවමත් තියෙන්නේ ඝනකම් මට්ටමක. ඔයිල් රත් වෙනකම් ඒවායේ දුස්ස්රාවිතතාවය (Viscosity) වැඩියි. එතකොට එන්ජිමේ සියුම් සිදුරු අතරින් ඔයිල් ගමන් කරන්න අපහසුයි. මේ වෙලාවේ රේස් කළොත් ලෝහ කොටස් එකිනෙක ඇතිල්ලීම නිසා එන්ජිමේ ආයු කාලය අඩු වෙන්න පුළුවන්. ඒ වගේම Turbocharger එකක් තියෙන වාහනයක් නම්, ඒකේ තියෙන බෙයාරින් (Bearings) වලට ඔයිල් යන්න අනිවාර්යයෙන්ම තත්පර කිහිපයක් යනවා. ඒ නිසා ටර්බෝ වාහන වල "Cold Start" එක ගැන මීට වඩා සැලකිලිමත් වෙන්න ඕනේ.

තවත් පැත්තකින් බැලුවොත්, වාහනය එක තැන තියලා රත් කරන එකෙන් රත් වෙන්නේ එන්ජිම විතරයි. හැබැයි වාහනයේ තියෙන ගියර් බොක්ස් එක, ඩිෆරන්සල් එක සහ ටයර් රත් වෙන්නේ නැහැ. ඒ නිසා වාහනය පණ ගන්වලා තත්පර 30කට පස්සේ හෙමින් ධාවනය කිරීමෙන් මේ හැම කොටසක්ම ඒකාකාරීව රත් වෙන්න පටන් ගන්නවා. මේක තමයි වාහනයක යාන්ත්‍රික සෞඛ්‍යයට හොඳම ක්‍රමය.

ශීතල කාලගුණය සහ එන්ජිම

ලංකාව වගේ රටක උෂ්ණත්වය වැඩියි. හැබැයි ඔයා ඉන්නේ නුවරඑළිය වගේ හරිම ශීතල පැත්තක නම්, එන්ජිම රත් කරන්න තවත් විනාඩියක් වගේ වැඩිපුර කාලයක් ගන්න එකේ වැරද්දක් නැහැ. මොකද අධික ශීතලට ඔයිල් තවත් ඝන වෙනවා. ඒ වගේම බැටරියටත් Cold Start එකකදී ලොකු වෙහෙසක් දරන්න වෙනවා. වාහනය ස්ටාර්ට් කරන කොටම AC එක, හෙඩ් ලයිට් වගේ දේවල් ඕෆ් කරලා තියන්න. එන්ජිම ස්ටාර්ට් වෙලා තත්පර කිහිපයකට පස්සේ ඒවා ඔන් කරන එක බැටරියේ ආයු කාලයටත් හොඳයි.

සමහරු පුරුදු වෙලා ඉන්නවා එන්ජිම ස්ටාර්ට් කරපු ගමන්ම රේස් කරන්න මේක නම් කරන්නම හොද නැති වැඩක්. ඒකෙන් වෙන්නේ පිස්ටන් රින්ග්ස් (Piston Rings) සහ සිලින්ඩර් බිත්ති වලට හානි වෙන එක. මතක තබා ගන්න, එන්ජිම ඇතුළේ තියෙන ලෝහ රත් වෙනකොට ප්‍රසාරණය වෙනවා. ඒ ප්‍රසාරණය වෙන්නේ නිශ්චිත මිනුම් වලට අනුවයි. එකපාරටම රත් කරන්න ගියොත් ඒ ලෝහ වලට දරාගන්න බැරි පීඩනයක් ඇති වෙන්න පුළුවන්.

Motor Guide අපේ උපදෙස්

අවසාන වශයෙන් කියන්න තියෙන්නේ, ඔයාගේ වාහනය පණ ගන්වලා, සීට් බෙල්ට් එක දාගෙන, කණ්ණාඩි ටික හදාගෙන, මියුසික් සිස්ටම් එක දාගන්න යන කාලය (තත්පර 30-45) එන්ජිම රත් වෙන්න හොඳටම ප්‍රමාණවත්. ඊට පස්සේ හෙමින් ගමන ආරම්භ කරන්න. එන්ජිමේ උෂ්ණත්වය සාමාන්‍ය මට්ටමට ආවට පස්සේ ඔයාට සාමාන්‍ය විදිහට ධාවනය කරන්න පුළුවන්. මේ සරල පියවර අනුගමනය කළොත් ඔයාගේ වාහනයේ එන්ජිම කිසිම කරදරයක් නැතුව අවුරුදු ගණනාවක් පාවිච්චි කරන්න පුළුවන් වෙයි.