එයාර් කූල් (Air-cooled) සහ ලික්විඩ් කූල් (Liquid-cooled) බයික් නඩත්තු කිරීමේ වෙනස.

බයික් එකක් ගන්න කලින් ගොඩක් දෙනෙක් අහන ප්‍රශ්නයක් තමයි මේ "එයාර් කූල්" (Air-cooled) ද නැත්නම් "ලික්විඩ් කූල්" (Liquid-cooled) එකක් ගන්නවාද කියන එක. මේ පද්ධති දෙක නඩත්තු කරන විදිහ අහසට පොළොව වගේ වෙනස්. Motor Guide අපි අද ඔයාට මේ දෙකේ තියෙන තාක්ෂණික වෙනසයි, නඩත්තු කරද්දී ඔයා දැනගන්නම ඕනේ රහස් ටිකයි කියලා දෙන්නම්. හොඳට මතක තියාගන්න, මේ දැනුම නැතිව බයික් එකක් පැද්දොත් එන්ජිම රත් වෙලා (Overheat) ලොකු පාඩුවක් වෙන්න පුළුවන්.

1. එයාර් කූල් (Air-cooled) එන්ජින් නඩත්තුව

එයාර් කූල් බයික් එකක එන්ජිම නිවෙන්නේ කෙලින්ම වටපිටාවේ තියෙන හුළඟෙන්. මේ එන්ජින් වල පිටතින් පීලි වගේ තියෙන "Cooling Fins" ඔයා දැකලා ඇති. මේ පද්ධතිය නඩත්තු කරන එක හරිම ලේසියි.

ප්‍රධානම දේ තමයි ඒ පීලි අතර මඩ හෝ කුණු තැන්පත් වෙන්න දෙන්න එපා. මඩ බැඳිලා තිබුණොත් හුළඟ වදින්නේ නැහැ, එතකොට එන්ජිම රත් වෙනවා. ඒ වගේම මේ බයික් වලට හොඳ තත්ත්වයේ එන්ජින් ඔයිල් එකක් පාවිච්චි කරන එක අතිශය වැදගත්. මොකද එයාර් කූල් එන්ජින් වල රස්නය පාලනය කරන්න තියෙන එකම දියරය එන්ජින් ඔයිල් විතරයි. එයාර් කූල් බයික් එකක් ලොකු ට්‍රැෆික් එකක එක දිගට නතර කරලා තියන එක එච්චර හොඳ නැහැ, මොකද වාහනය ඉස්සරහට යද්දී වදින හුළඟ නැති වුණාම එන්ජිම නිවෙන්නේ නැහැ.

2. ලික්විඩ් කූල් (Liquid-cooled) එන්ජින් නඩත්තුව

ලික්විඩ් කූල් කියන්නේ ඔය අලුතින් එන රේසින් බයික් සහ ලොකු ස්කූටර් වල තියෙන පද්ධතියක් අද වෙනකොට සාමාන්‍ය බයිසිකල් වලත් මේ ක්‍රමය භාවිතා කරනව. මේකේ එන්ජිම නිවෙන්නේ "Coolant" කියලා දියරයක් පාවිච්චි කරලා. මේ පද්ධතිය නඩත්තු කරන්න නම් ඔයාට ටිකක් මහන්සි වෙන්න වෙනවා.

මෙතනදී ප්‍රධානම දේ තමයි රේඩියේටර් (Radiator) එක. ඒකේ තියෙන කුඩා Fins වලට හානි වෙන්න දෙන්න එපා. ඒ වගේම, හැම මාසෙකට සැරයක්ම "Coolant Level" එක පරීක්ෂා කරන්න ඕනෙ. ඒ වගේම නියමිත කාලයට ඒව මාරු කරන්නත් ඕනෙ. හැබැයි කවදාවත් එන්ජිම රත් වෙලා තියෙද්දී රේඩියේටර් කැප් එක අරින්න එපා. රත්වුණු වතුර මූණට විසි වෙලා ලොකු අනතුරක් වෙන්න පුලුවන්.

3. කුලන්ට් (Coolant) සහ සාමාන්‍ය වතුර පාවිච්චිය

ගොඩක් අය කරන ලොකුම වැරැද්ද තමයි ලික්විඩ් කූල් බයික් වලට සාමාන්‍ය වතුර පාවිච්චි කරන එක. සාමාන්‍ය වතුරෙන් එන්ජිම ඇතුළේ මලකඩ කන්න බලනවා වගේම, රේඩියේටර් එක හිර වෙන්නත් බලනවා. ඒ නිසා නිෂ්පාදකයා නිර්දේශ කරපු නියමිත "Coolant" වර්ගයම පාවිච්චි කරන්න. මේ දියරය සාමාන්‍යයෙන් අවුරුදු දෙකකට සැරයක්වත් සම්පූර්ණයෙන් අයින් කරලා (Flush කරලා) අලුතින් දාන්න ඕනේ. එහෙම නොකළොත් කුලන්ට් එකේ ගුණය නැති වෙලා එන්ජිම ඇතුළේ ඇලුමිනියම් කොටස් දිය වෙන්න පටන් ගන්නවා.

4. සෙන්සර් සහ පංකා (Sensors & Fan)

ලික්විඩ් කූල් බයික් එකක රේඩියේටර් එකට පිටුපසින් කුඩා විදුලි පංකාවක් (Cooling Fan) තියෙනවා. එන්ජිම නියමිත රස්නයට වඩා වැඩි වුණාම මේක ස්වයංක්‍රීයව වැඩ කරන්න ඕනේ. ඔයා ට්‍රැෆික් එකක ඉද්දී මේ ෆෑන් එක වැඩ කරන්නේ නැත්නම්, වහාම බයික් එක නවත්තලා පරීක්ෂා කරන්න. ඒ වගේම, ඩෑෂ්බෝඩ් එකේ තියෙන "Temperature Warning" ලයිට් එක ගැන නිතරම අවධානයෙන් ඉන්න. මේ පද්ධති වල තියෙන තර්මොස්ටැට් (Thermostat) එක වගේ සෙන්සර් සවුත්තු වුණොත් එන්ජිම එකපාරටම "Seize" වෙන්න ඉඩ තියෙනවා.

සාරාංශය: එයාර් කූල් බයික් එකක් නඩත්තුව අඩු නිසා ලේසියි, හැබැයි ලොකු දූර ගමන් යද්දී රස්නය පාලනය කරගන්න ඔයාට ගොඩක් පරෙස්සම් වෙන්න වෙනවා. ලික්විඩ් කූල් බයික් එකක් නඩත්තුවට වියදම ටිකක් වැඩි වුණාට, ඕනෑම දුරක් එන්ජිමේ පවර් එක අඩු වෙන්නේ නැතුව යන්න ඒක උදව් වෙනවා. නඩත්තු කරද්දී දෙකටම පොදු දේ තමයි නිවැරදි "Engine Oil" සහ නියමිත වෙලාවට කරන "Service" එක. මේ ටික පිළිපැද්දොත් ඔයාගේ බයික් එක අවුරුදු ගාණක් අලුත් එක වගේ තියාගන්න පුළුවන්.