බයික් එකක Spark Plug එකේ පාට අනුව එන්ජිමේ තත්ත්වය (Health) නිවැරදිව හඳුනාගන්නේ කොහොමද

බයික් එකක් පදින කෙනෙක් තමන්ගේ වාහනේ එන්ජිම ඇතුළේ මොකද වෙන්නේ කියලා දැනගන්න තියෙන ලේසිම සහ හොඳම ක්‍රමය තමයි "Spark Plug" එක ගලවලා බලන එක. අපේ ඇඟට ලෙඩක් හැදුණාම ඩොක්ටර්ස්ලා දිව බලලා ලෙඩේ කියනවා වගේ, බාස් කෙනෙක්ට ස්පාර්ක් ප්ලග් එකේ පාට දැක්කම එන්ජිමේ තත්ත්වය (Engine Health) ගැන ඕනෑම දෙයක් කියන්න පුළුවන්. අද Motor Guide අපි ඔයාලට කියලා දෙන්නම් ප්ලග් එකේ පාටෙන් එන්ජිමේ ලෙඩ අල්ලගන්න හැටි.

1. ලා දුඹුරු හෝ අළු පාට (Tan or Greyish-White)

ඔයා ප්ලග් එක ගලවලා බැලුවම ඒකේ අග (Insulator nose) ලා දුඹුරු පාටට හෝ අළු පාටට හුරු විදිහට පේනවා නම්, ඔයා හරිම වාසනාවන්තයි. ඒ කියන්නේ ඔයාගේ බයික් එකේ එන්ජිම තියෙන්නේ හොද තත්ත්වයක. ඉන්ධන සහ වාතය මිශ්‍රණය (Air-fuel mixture) නියමිත ගණනට තියෙනවා, ප්ලග් එක නියමිත රස්නයෙන් වැඩ කරනවා, එන්ජිම ඇතුළේ පිච්චීම (Combustion) හරියටම වෙනවා. මේ වගේ වෙලාවට අනවශ්‍ය විදිහට කරදර වෙන්න දෙයක් නැහැ, සාමාන්‍ය විදිහට නඩත්තු කරගෙන යන්න.

2. කහට බැඳුණු කළු පාට (Dry Black Soot/Carbon Fouling)

ප්ලග් එක ගලවද්දී ඒකේ අග වේලිච්ච කළු පාට කුඩු වගේ බැඳිලා තියෙනවා නම්, ඒකෙන් කියන්නේ "Rich Mixture" එකක් තියෙනවා කියන එකයි. ඒ කියන්නේ එන්ජිමට ඕනෑවට වඩා පෙට්‍රල් දහනය වෙනව, නමුත් ඒ පෙට්‍රල් පිච්චෙන්න අවශ්‍ය වාතය මදි කියන එක. මේකට හේතුව ඔයාගේ එයාර් ෆිල්ටර් (Air Filter) එක හිර වෙලා තියෙන එක හෝ කාබියුලේටර්/ඉන්ජෙක්ටර් එකේ අවුලක් වෙන්න පුළුවන්. මේකෙන් වෙන්නේ බයික් එකේ පෙට්‍රල් වැඩ කරන ප්‍රමාණය අඩු වෙන එකයි, ප්ලග් එක ලෙහෙසියෙන්ම ෂෝට් වෙන එකයි.

3. තෙල් ගතියෙන් යුත් කළු පාට (Wet Oily Black)

මේක නම් ටිකක් බරපතළ තත්ත්වයක්. ප්ලග් එක කළු පාට වෙලා ඒකේ තෙල් ගතියකුත් තියනව නම්, ඒ කියන්නේ එන්ජින් ඔයිල් (Engine Oil) Combustion Chamber එකට කාන්දු වෙනවා කියන එක. ගොඩක් වෙලාවට එන්ජිමේ පිස්ටන් රින්ග්ස් (Piston Rings) ගෙවිලා හෝ වෑල්ව් සීල් (Valve Seals) සවුත්තු වෙලා තිබුණාම තමයි මෙහෙම වෙන්නේ. මේ වගේ වෙලාවක සයිලන්සර් එකෙන් සුදු පාට දුමක් එනවා ඔයාට පෙනේවි. මේ ලෙඩේට නම් ඉක්මනින්ම එන්ජිම ගලවලා රෙපයාර් එකක් කරන්න වෙනවා.

4. සුදු පාටට හුරු දිලිසෙන ගතිය (Ashy White/Overheating)

ප්ලග් එකේ අග හරිම සුදු පාටයි නම් සහ ඒකේ පුංචි බිබිලි වගේ දේවල් පේනවා නම්, ඒ කියන්නේ එන්ජිම ඕනෑවට වඩා රත් වෙනවා (Overheating). මේකට හේතුව පෙට්‍රල් ප්‍රමාණය මදි වෙලා වාතය වැඩි වීම (Lean Mixture). එහෙමත් නැත්නම් ඔයා පාවිච්චි කරන්නේ බයික් එකට නොගැලපෙන, රස්නය වැඩියෙන් රඳවා ගන්නා "Hot Plug" එකක් වෙන්නත් පුළුවන්. මේ තත්ත්වය දිගටම තිබුණොත් පිස්ටන් එක උණු වෙලා එන්ජිම "Jam" වෙන්න ඉඩ තියෙනවා.

5. ඉලෙක්ට්‍රෝඩය ගෙවී යාම හෝ දිය වී යාම (Worn Out/Melted)

ප්ලග් එකේ මැද තියෙන කම්බි කෑල්ල (Electrode) ගෙවිලා කොට වෙලා නම් හෝ ඒක දිය වෙලා වගේ පේනවා නම්, ඒ කියන්නේ ප්ලග් එකේ ආයු කාලය ඉවරයි. ගොඩක් කාලයක් ප්ලග් එක මාරු නොකර පාවිච්චි කළාම මේක වෙනවා. මේ නිසා බයික් එක ස්ටාර්ට් වෙන්න අමාරු වීම, මිස් කිරීම (Misfiring) වගේ දේවල් වෙන්න පුළුවන්. නියමිත කිලෝමීටර් ගණනට පස්සේ ප්ලග් එක අනිවාර්යයෙන්ම මාරු කරන්න වග බලාගන්න.

Motor Guide අපේ උපදෙස්: කවදාවත් ප්ලග් එකේ ලෙඩක් දැක්කම ප්ලග් එක විතරක් මාරු කරලා වැඩේ නතර කරන්න එපා. ප්ලග් එකේ පාට වෙනස් වුණේ ඇයි කියන මූලික හේතුව (Root Cause) හොයලා ඒක හදන්න. එයාර් ෆිල්ටර් එක පිරිසිදු කිරීම, කාබියුලේටර් ටියුන් කිරීම වගේ දේවල් නියමිත වෙලාවට කළොත් ප්ලග් එකත් රැකගෙන එන්ජිමත් රැකගන්න පුළුවන්.