Engine splash shield එක ඉවත් කිරීම සුදුසුයි ද?
Motor Guide අපි අද කතා කරන්න යන්නෙ වාහනයක පහළින්ම තියෙන Engine splash shield එහෙමත් නැත්නම් අන්ඩර් කවර් (Under Cover) එක ගලවල අයින් කරන එක කොච්චර දුරට සුදුසුයි ද කියන කාරණාව ගැනයි. ගොඩක් වෙලාවට කාර් සර්විස් එකකට ගියාම හරි, නැත්නම් වාහනෙක මොකක් හරි රෙපෙයාර් එකක් කරද්දි හරි මේ ප්ලාස්ටික් හෝ ෆයිබර් ආවරණය අයින් කරල දාන්න කියල යාළුවෝ අපිට කියනවා අහන්න ලැබෙනවා. ඒ වගේම මේක ගැලෙව්වම එන්ජිමට හුළං හොඳට වදිනව කියලත් ගොඩක් දෙනෙක් හිතනවා. ඒත් ඇත්තටම මේක ගලවලා දාන එක වාහනෙට හොඳද නරකද කියල අපි අද තාක්ෂණික පැත්තෙන් ගැඹුරින්ම කතා කරමු.
Engine splash shield යනු කුමක්ද?
මුලින්ම අපි බලමු මොකක්ද මේ Engine splash shield එකක් කියන්නේ සහ ඒක වාහනේක කොච්චර වැදගත්ද කියලා. මේක සාමාන්යයෙන් කල් පවතින ප්ලාස්ටික්, ඇලුමිනියම් හෝ ෆයිබර් වර්ගයකින් හදපු, එන්ජිමේ සහ ගියර් බොක්සයේ යට කොටස සම්පූර්ණයෙන්ම වගේ ආවරණය කරන තහඩුවක්. වාහනයක් පාරේ යද්දී පාරේ තියෙන වතුර, කුඩා ගල් කැට, මඩ, දූවිලි සහ විවිධ කසළ එන්ජින් බේ එක ඇතුළට විසිවෙන එකෙන් මේකෙන් තමයි ප්රධාන වශයෙන්ම ආරක්ෂා කරන්නේ. විශේෂයෙන්ම වැස්ස කාලෙක පාරේ ජලය පිරුණු වලවල් හරහා වාහනේ යද්දී මේ ආවරණය නැත්නම් එන්ජින් එකේ තියෙන විදුලි සම්බන්ධතා (Electrical wiring), සෙන්සර් සහ ඕල්ටනේටර් (Alternator) වගේ කොටස් වලට කෙලින්ම වතුර වැදිලා වාහනේ අතරමඟ නතර වෙන්න වුණත් පුළුවන්.
එන්ජිම සිසිල් වීම සහ වායු ගති විද්යාව (Aerodynamics)
මේ ක්ෂේත්රයේ ඉන්න අය විදියට අපි දකින ප්රධානම ගැටළුවක් තමයි, සමහර වාහන හිමිකරුවන් මේක ගලවලා දාන්නේ එන්ජිම හොඳින් සිසිල් වෙන්න (Engine cooling) උදව් වෙයි කියන වැරදි වැටහීම උඩ වීම. හැබැයි නවීන වාහන නිෂ්පාදකයෝ මේ ආවරණ නිර්මාණය කරලා තියෙන්නේ ඉතාම සංකීර්ණ වායු ගතික (Aerodynamics) න්යායන් පදනම් කරගෙනයි. වාහනයක් අධික වේගයෙන් යද්දී, මේ ආවරණය නිසා යටින් යන වායු ධාරාව සුමටව (Smooth airflow) ගමන් කරනවා. ඒ හරහා වාහනය යට වායු පීඩනය අඩු වෙලා, වාහනේ බර පාරට ස්ථාවරව තද වෙලා තියෙන්නත් (Downforce) මේක ලොකු උදව්වක් වෙනවා. එහෙම නැතුව එන්ජිම සිසිල් වීම සම්පූර්ණයෙන්ම රඳා පවතින්නේ රේඩියේටරය, කූලන්ට් පද්ධතිය සහ ෆෑන් එක මත මිසක් මේ ප්ලාස්ටික් කවරය මත නෙවෙයි.
ඉන්ධන කාර්යක්ෂමතාවට ඇති බලපෑම
ඒ වගේම තමයි, මේ ආවරණය නැති වුණාම වාහනයේ ඉන්ධන කාර්යක්ෂමතාවට (Fuel efficiency) පවා බලපෑම් ඇති වෙන්න පුළුවන්. කොහොමද ඒක වෙන්නේ? ආවරණය නැති වුණාම වාහනය යටින් යන වාතය රළු මතුපිටවල් වල වැදිලා වායු බාධක (Air drag) වැඩි වෙනවා. ඒකෙන් වාහනය ඉදිරියට යන්න වැඩි එන්ජින් බලයක් අවශ්ය වන නිසා ඉන්ධන පරිභෝජනයත් ටිකක් වැඩි වෙනවා. ඒ නිසා මේක නිකන්ම නිකන් ප්ලාස්ටික් කෑල්ලක් කියලා හිතලා අතහැරලා දාන්න බැහැ. වාහනයේ සමස්ත ක්රියාකාරීත්වයට මේකෙන් ලොකු සේවයක් සිද්ධ වෙනවා.
ආවරණය ඉවත් කිරීමට පෙළඹෙන හේතු
හැබැයි අනෙක් පැත්තෙන් ගත්තම, මේ splash shield එක ගලවලා දාන්න හිතෙන අවස්ථා නැතුවම නෙවෙයි. සමහර පාවිච්චි කළපු (Used) වාහන වල මේකේ ක්ලිප් සහ නට් බෝල්ට් කැඩිලා, වාහනේ යද්දී කරදරකාරී ශබ්ද (Rattling noises) එන්න පටන් ගන්නවා. ඒ වගේම එන්ජින් ඔයිල් මාරු කරන වාරයක් පාසා මේක ගලවලා හයි කරන්න ටිකක් වෙලා යන නිසා, සමහර යාන්ත්රික ශිල්පීන් පවා මේක දාන්නේ නැතුව ඉන්න උපදෙස් දෙන අවස්ථා තියෙනවා. ඒ වගේම, වාහන එන්ජිමෙන් ඔයිල් ලීක් වීමක් හෝ කූලන්ට් ලීක් වීමක් වෙනව නම්, මේ ආවරණය නිසා ඒක මුලින්ම අපිට පෙනෙන්නේ නැතුව යන්න පුළුවන්. ඒකෙන් ලොකු හානියක් වෙන්න කලින් ලීක් එක හදුනාගන්න බැරි වෙන එක අවාසියක් තමයි.
ආරක්ෂිත සහ බුද්ධිමත්ම විසඳුම
ඒත් ඉතින්, ඔයිල් ලීක් එකක් වගේ දේකට තියෙන විසඳුම මේ ආවරණය ගලවලා දාන එක නෙවෙයි, ලීක් එක හදාගන්න එකයි. යම් හෙයකින් ඔබේ වාහනයේ මුල් ආවරණය කැඩිලා ගිහින් නම්, ගුණාත්මක භාවයෙන් යුතු අලුත් ආවරණයක් සවි කරගන්න එක තමයි හැමවෙලේම ආරක්ෂිතම සහ බුද්ධිමත්ම දේ වෙන්නේ. විශේෂයෙන්ම ලංකාව වගේ වැස්ස වැඩි, පාරවල් වල වලවල් තියෙන රටක මේක නැතුව වාහනයක් පදවනවා කියන්නේ එන්ජිමට සහ යට කොටසේ තියෙන මිල අධික උපාංග වලට අනවශ්ය අවදානමක් දීමක්.
මෝටර් රථ ඉංජිනේරු විද්යාවට අනුව, නිෂ්පාදකයන් විසින් වාහනයක අඟලක් අඟලක් පාසා නිර්මාණය කරල තියන්නෙ යම් නිශ්චිත අරමුණක් වෙනුවෙන්මයි. එන්ජින් splash shield එක කියන්නෙත් නිකන්ම බර වැඩි කරන්න දාපු දෙයක් නෙවෙයි. ඒ නිසා අමාරුවෙන් හරි ඒක නියමිත විදිහට වාහනේ රඳවා ගන්න එකෙන් අපිට අනපේක්ෂිත ලොකු වියදම් වලින් බේරෙන්න පුළුවන්.
Motor Guide අපේ උපදෙස
Motor Guide අපේ උපදෙස තමයි, හැකිතාක් දුරට ඔබේ වාහනයේ Engine splash shield එක ආරක්ෂා කරගෙන, එය නියමිත පරිදි බෝල්ට් හයි කරල තියාගන්න. යම් හෙයකින් එයට හානි වී ඇත්නම්, හැකි ඉක්මනින් නව ආවරණයක් මඟින් එය ප්රතිස්ථාපනය කරන්න. ඒ වගේම නවීන වාහන සහ තාක්ෂණය ගැන මෙවැනිම වටිනා තොරතුරු දැනගන්න හැමදාමත් අපේ Motor Guide එක්ක රැඳී ඉන්න කියලත් මතක් කරනව.
ලියන ලද්දේ
Nisaga Sandaru
A versatile and highly experienced professional, currently an Automobile undergraduate at the University of Jaffna, with strong technical expertise grounded in hands-on work as a technician with SriLankan Airlines Ground Support Equipment (GSE). Holding an Automobile NVQ Level 3 qualification, along with specialized certifications in Vehicle ECU Programming and Diagnosis, and extensive experience in arc welding and vehicle body painting, and well equipped to handle complex automotive, diagnostic, and fabrication-related tasks with a high level of competence.
