Auto Gear වාහනයක නොකළ යුතු දේවල්
Auto Gear වාහනයක නොකළ යුතු දේවල්
ඔබේ ඔටෝ ගියර් (Auto Gear) වාහනයේ ආයු කාලය වැඩි කර ගැනීමටත්, අනවශ්‍ය අලුත්වැඩියා වියදම් අවම කර ගැනීමටත් නොකළ යුතු ඉතා වැදගත් දේවල් කිහිපයක් ගැන තමයි අද කතාකරන්න යන්නෙ. මේවා නිතරම මතක තබා ගැනීම ඉතා වැදගත් කරුණු.
1. නවතින්න කලින් 'Reverse (R)' හෝ 'Park (P)' වෙත මාරු කිරීම
වාහනය සම්පූර්ණයෙන්ම නොනවත්වා 'Drive (D)' එකේ සිට 'Reverse (R)' හෝ 'Park (P)' වෙත මාරු කිරීමෙන් වැළකින්න. මෙය සම්ප්‍රේෂණ පද්ධතියට (Transmission) දැඩි හානියක් සිදු කරයි. Park ගියරයේ ඇති locking pin එක කැඩී යාමට හෝ ගෙවී යාමට ඉඩ ඇත.
2. ට්‍රැෆික් ලයිට් වලදී 'Neutral (N)' එකට දැමීම
ට්‍රැෆික් ලයිට් වලදී හෝ කෙටි වෙලාවක් නවත්වන විට 'Neutral' (N) එකට දැමීම අවශ්‍ය නැහැ. නිතරම 'D' සහ 'N' අතර මාරු කිරීමෙන් සම්ප්‍රේෂණයේ කොටස් ඉක්මනින් ගෙවී යාමට හානියක් වනවා.
3. පල්ලම් බැසීමේදී 'Neutral (N)' එකේ තැබීම
පල්ලම් බැසීමේදී 'N' එකේ තබා ධාවනය කිරීමෙන් Brake System එකට අධික පීඩනයක් එල්ල වේ. ඒ වෙනුවට 'L', '2', හෝ '3' වැනි පහළ ගියර භාවිතා කර Engine Braking යොදාගන්න.
4. තිරිංගය පෑගී තිබියදී ඇක්සලරේටරය පෑගීම
තිරිංගය (Brake) පෑගී තිබියදී ඇක්සලරේටරය (Accelerator) පෑගීමෙන් සම්ප්‍රේෂණය හානි වෙයි. නවීන වාහනවල මෙය වැළැක්වීමට ආරක්ෂිත ක්‍රම තිබුණත්, පුරුද්දක් ලෙස මෙය කළ යුතු නැහැ.
5. ඉන්ධන අවසන් වන තෙක් ධාවනය කිරීම
Fuel Light දැල්වී තිබියදී දිගින් දිගටම ධාවනය නොකරන්න. ඉන්ධන ටැංකියේ දූවිලි සහ ජල බිඳිති ඉන්ධන පොම්පය (Fuel Pump) හානි කරයි. ඉන්ධන මට්ටම සෑම විටම තරමකට ඉහළ තබා ගන්න.
6. Transmission Oil පරීක්ෂා නොකිරීම
Engine Oil මෙන්ම Transmission Fluid මට්ටම පරීක්ෂා කිරීම අත්‍යවශ්‍යයි. අඩු තෙල් මට්ටමක් හෝ දූෂිත තෙල් ගියර් බොක්ස් එකේ ඝර්ෂණය වැඩි කර අලුත්වැඩියාවකට හේතු වනවා.
7. සීතල එන්ජිම සමඟ අධික වේගයෙන් ධාවනය කිරීම
වාහනය පණ ගැන්වූ වහාම ඉක්මන් වේගයෙන් ධාවනය නොකරන්න. Transmission Fluid සහ Engine Oil උෂ්ණත්වයට පැමිණීමට මිනිත්තුවක් හෝ දෙකක් ඉඩ දෙන්න.
8. බ්‍රේක් එකේ පාදය නිතර තබාගෙන සිටීම
තිරිංග පැඩලය මත පාදය නිතර තබාගෙන සිටීමෙන් Brake Pads ඉක්මනින් ගෙවී යාමට සහ තිරිංග පද්ධතිය අධික ලෙස රත් වීමට හේතු වේ.
9. රෝද ලිස්සා යන විට 'D' සහ 'R' අතර ඉක්මනින් මාරු කිරීම
රෝද ලිස්සා යන විට Drive (D) සහ Reverse (R) අතර ඉක්මනින් මාරු කිරීමෙන් Transmission Shock ඇතිවෙයි. එක් එක් ගියරයට මාරු කිරීමට පෙර වාහනය සම්පූර්ණයෙන්ම නතර කරන්න.
10. 'Spare Tire' සමඟ දිගු කාලයක් ධාවනය කිරීම
“Donut” ලෙස හැඳින්වෙන කුඩා අමතර ටයරය දිගු දුරක් හෝ වේගයෙන් ධාවනය කිරීමෙන් Differential හා Transmission පද්ධතියට හානි විය හැක. හැකි ඉක්මනින් සාමාන්‍ය ටයරයක් සවි කරන්න.
11. 'P' එකට දැමීමට පෙර Hand Brake නොදැමීම
වාහනය නවතා 'Park (P)' එකට දැමීමට පෙර සෑම විටම අත් තිරිංගය යොදන්න. 'P' එකට දැමූ විට වාහනයේ බර Locking Pin එකට පමණක් පැටවීමෙන් හානි විය හැක.
නිවැරදි ක්‍රමය:
- තිරිංගය තද කරන්න
- 'Neutral (N)' එකට දැමන්න
- අත් තිරිංගය තදින් අදින්න
- 'Park (P)' එකට මාරු කරන්න
- ඊට පසු තිරිංගයෙන් පාදය ඉවත් කරන්න
මෙම නිවැරදි පුරුදු අනුගමනය කිරීමෙන් ඔබේ ඔටෝ ගියර් වාහනයේ සම්ප්‍රේෂණ පද්ධතියට (Transmission) සිදුවිය හැකි හානි අවම කර ගැනීමට පුළුවන්.
ලියන ලද්දේ
Nisaga Sandaru
A versatile and highly experienced professional, currently an Automobile undergraduate at the University of Jaffna, with strong technical expertise grounded in hands-on work as a technician with SriLankan Airlines Ground Support Equipment (GSE). Holding an Automobile NVQ Level 3 qualification, along with specialized certifications in Vehicle ECU Programming and Diagnosis, and extensive experience in arc welding and vehicle body painting, and well equipped to handle complex automotive, diagnostic, and fabrication-related tasks with a high level of competence.
