Wheel Alignment සහ Balancing ගැන ඉගෙනගමු.

Wheel Alignment සහ Balancing ගැන ඉගෙනගමු

වාහනයක් පාවිච්චි කරන හැමෝම නිතරම අහන වචන දෙකක් තමයි Wheel Alignment සහ Wheel Balancing කියන්නේ. හැබැයි මේ දෙකේ වෙනස සහ මේවා වැදගත් වෙන්නේ ඇයි කියලා ගොඩක් දෙනෙක් හරියටම දන්නේ නැහැ. අද අපි ඒ ගැන සරලව කතා කරමු.

මොකක්ද මේ Wheel Alignment කියන්නේ?

Wheel Alignment (රෝද පෙළගැස්ම) කියන්නේ වාහනයේ රෝද එකිනෙකට සාපේක්ෂව සහ පොළොවට සාපේක්ෂව පිහිටිය යුතු නිවැරදි කෝණවලට සකස් කිරීමයි. කාලයක් වාහනය පාවිච්චි කරනකොට, විශේෂයෙන්ම වලවල් වල වැටීම නිසා මේ කෝණ වෙනස් වෙන්න පුළුවන්. මෙහිදී ප්‍රධාන වශයෙන් Camber, Caster සහ Toe කියන මිනුම් තුන පරීක්ෂා කරලා නිවැරදි කරනවා.

ඔබේ වාහනයේ එලවන විට සුක්කානම (Steering wheel) එක පැත්තකට ඇදගෙන යනවා නම් හෝ රෝද අසමාන ලෙස ගෙවෙනවා නම් (එක පැත්තක් පමණක් ගෙවීම), අනිවාර්යයෙන්ම Wheel Alignment පරීක්ෂා කරගන්න ඕනේ. නිවැරදි ඇලයිමන්ට් එකක් තිබීමෙන් වාහනයේ පාලනය (Handling) පහසු වෙනවා වගේම ටයර් වල ආයු කාලයත් වැඩි වෙනවා.

Wheel Balancing කියන්නේ මොකක්ද?

Wheel Balancing කියන්නේ රෝදයේ සහ ටයරයේ බර ඒකාකාරී ලෙස බෙදී යන ආකාරයට සකස් කිරීමයි. ටයර් එකක් සහ රිම් (Rim) එකක් නිෂ්පාදනය කරද්දී ඒවායේ හැම තැනකම බර මිලිග්‍රෑම් එකටම සමාන වෙන්නේ නැහැ. රෝදය වේගයෙන් කැරකෙන විට මේ බරෙහි සුළු වෙනසක් පවා විශාල ගැස්සීමක් ඇති කරන්න පුළුවන්.

වාහනය යම් වේගයකින් (උදාහරණයක් ලෙස 80km/h ට වඩා වැඩි වේගයකින්) යනකොට සුක්කානම හෝ මුළු වාහනයම වෙව්ලනවා වගේ දැනෙනවා නම්, ඒ රෝද වල බැලන්ස් එක නැති වීමේ ලක්ෂණයක්. මෙහිදී කරන්නේ විශේෂිත මැෂින් එකක් ආධාරයෙන් රෝදයේ බර අඩු පැත්තට කුඩා "ඊයම් කැබලි" (Weights) එකතු කරලා රෝදය සමබර කිරීමයි.

ඇයි මේ දෙකම වැදගත් වෙන්නේ?

මේ නඩත්තු කටයුතු දෙකම නිසි වෙලාවට කිරීමෙන් ඔබට වාසි කිහිපයක් ලැබෙනවා:

• ටයර් ආරක්ෂා වීම: ඒ කියන්නෙ ටයර් අසමාන ලෙස ගෙවී ඉක්මනින් විනාශ වීම වැළැක්වීමයි.
• ඉන්ධන පිරිමැසුම: රෝද නිවැරදිව පෙළගැසී ඇති විට එන්ජිමට වාහනය ඉදිරියට තල්ලු කිරීමට ලොකු වෙහෙසක් ගන්න වෙන්නේ නැහැ.
• ආරක්ෂාව: මෙහිදී පාරේ ලිස්සා යාමේ අවදානම අඩු වන අතර වාහනය පාලනය කිරීම පහසු වේනවා.
• සුවපහසුව: වාහනය වෙව්ලීම සහ පසෙකට ඇදගෙන යාම නැති නිසා සුවපහසු ගමනක් යාමට හැකි වෙනවා.

සාමාන්‍යයෙන් සෑම කිලෝමීටර් 8,000 - 10,000 කට වරක් හෝ මාස 6කට වරක් මේ පරීක්ෂාවන් සිදු කිරීම ඉතාම සුදුසුයි.

නියමිත කාලයට අමතරව පහත අවස්ථාවලදී අනිවාර්යයෙන්ම Alignment සහ Balancing පරීක්ෂා කළ යුතුමයි:

• අලුතින් ටයර් දෙකක් හෝ හතරක් දැමූ විට.
• වාහනයේ Suspension (සස්පෙන්ෂන්) පද්ධතියේ කොටස් (උදා: Rack ends, Ball joints, Bush) මාරු කළ විට.
• තදින් වලක වැටුණු විට හෝ පාර අයිනේ ඇති ගැට්ටක (Curb) රෝදය වැදුණු විට.
• අධික වේගයෙන් යන විට සුක්කානම ගැහෙනවා (Vibrate) නම්.

ඔබේ වාහනයේ ටයර් මාරු කරන්නේ නැතුව දිගු කාලයක් පාවිච්චි කරන්න නම් "Tire Rotation" (ටයර් මාරු කර දැමීම) කියන ක්‍රමයත් ඉතා වැදගත්.